Namanganda oraliq imtihondan o‘tolmagan talaba o‘ziga o‘t qo‘ydi

2023 yil 10 fevral kuni Namangan muhandislik qurilish institutining 3-bosqich talabasi o‘z joniga qasd qilgan. Bosh prokuratura matbuot xizmati Kun.uz'ga ma’lum qilishicha, 2002 yilda tug‘ilgan X.X. Farg‘ona viloyati Beshariq tumanidan bo‘lgan.

X.X. beshta fandan oraliq nazoratdan o‘tolmay, qayta topshirishga qolgan. Talabaning guruh murabbiyi X.X.ning otasiga qo‘ng‘iroq qilib uni bu haqda ogohlantirgan. Ota esa o‘g‘liga telefonda tanbeh bergan.

Shundan so‘ng, X.X. otasiga zarda qilib, ruhiy tushkunlikka tushib, Yangiqo‘rg‘on tumani «Nurafshon» MFY hududidagi dala-adirlikda ustiga benzin sepib, o‘ziga o‘t qo‘ygan.

Yonayotgan X.X.ni ko‘rgan odamlar uni shifoxonaga olib borishgan. Tibbiy ma’lumotga ko‘ra, X.X.ning badanining 50 foiz qismi kuygani sabab ko‘rsatilgan tibbiy yordamga qaramay, 13 fevral kuni shifoxonada vafot etgan.

Holat yuzasidan Yangiqo‘rg‘on tuman prokuraturasi tomonidan JKning 103-moddasi 1-qismi bilan jinoyat ishi qo‘zg‘atilgan. Tergov harakatlari olib borilmoqda.