O‘zbekistonlik qariya 21 yil davomida Qozog‘istonda hujjatsiz yurgani ma’lum bo‘ldi

Qozog‘istonning Atirau viloyatida 21 yildan beri hujjatsiz yashab kelayotgan o‘zbekistonlik qariya aniqlandi. Shaxsi aniqlangach, xorijlik fuqaro o‘z mamlakatiga qaytariladi, deb xabar berdi Kazinform.

Viloyat politsiya departamenti matbuot xizmati xabar berishicha, 20 yanvardan buyon «Migrant» favqulodda profilaktika tadbiri o‘tkazilmoqda.

«Tadbir davomida hujjatsiz yurgan 72 yoshli xorijlik fuqaro aniqlandi. O‘zbekiston fuqarosi Qozog‘istonga 2000 yilda kelgan. Qozoq ayoli bilan oila qurgan. Er-xotinning besh farzandi bor. Uning so‘zlariga ko‘ra, o‘sha yillarda hujjat tayyorlamoqchi bo‘lgan. Biroq, barcha kerakli hujjatlarni taqdim eta olmagan», deyiladi xabarda.

Hozirda Atirau shahar politsiya boshqarmasi migratsiya xizmati bo‘limi xodimlari hujjatlarni yig‘moqda. Xususan, 1951 yilda tug‘ilgan xorijlikning shaxsini aniqlash va o‘z mamlakatiga qaytarish uchun O‘zbekiston Respublikasining Aqtau shahridagi konsulligiga tegishli hujjatlar ro‘yxati yuborilgan.