O‘zbekiston qutqaruvchilari Turkiyadagi vayronalar ostidan 18 kishini qutqarib oldi

Favqulodda vaziyatlar vazirligi (FVV) otryadi 25 fevral kuni Turkiyadan O‘zbekistonga qaytib keldi. 100 kishidan iborat qidiruv-qutqaruv guruhi 7 fevral kuni tabiiy ofat o‘chog‘i, aniqrog‘i Hatay viloyatiga jo‘natilgan edi.

FVV xabariga ko‘ra, O‘zbekiston otryadi ishtirokidagi qutqaruv operatsiyasi ikki haftadan ko‘proq davom etdi va shu vaqt ichida ular 18 kishini qutqarib qolishga, shuningdek, 200 ga yaqin halok bo‘lganlarning jasadini olib chiqishga muvaffaq bo‘lishdi.

Qidiruv-qutqaruv ishlariga Favqulodda vaziyatlar vazirligining maxsus texnikasi va kinologiya brigadalari jalb etilgan bo‘lib, ular qutqaruvchilar bilan birga ish olib borishdi.

Avvalroq O‘zbekiston prezidenti topshirig‘iga ko‘ra, Turkiyaning tabiiy ofat hududiga 6 ta gumanitar yuk – dori-darmon, ko‘rpa-to‘shak, chodir va boshqa zarur ashyolar yuborilgan edi. 8 fevral kuni O‘zbekiston Mudofaa vazirligining harbiy shifokorlari bo‘lgan samolyoti ham Hatay viloyatiga jo‘natildi.

6 fevral kuni Turkiya janubida yuz bergan halokatli zilzilalar oqibatida 44 mingdan ortiq odam halok bo‘ldi, o‘n minglab odamlar jarohatlandi, minglab uylar vayron bo‘lgan edi.

Vayronkor zilzila qo‘shni mamlakatlarda, jumladan Suriya, Livan, Kipr, Gretsiya va Iroqda ham sezildi.