Polsha O‘zbekistonda elektr yoritish moslamalari ishlab chiqarish bo‘yicha loyihani amalga oshiradi

Mamlakat diplomatiya vakolatxonasi rahbari LUG Light Factory bosh direktori T.Makarski bilan muzokaralar o‘tkazdi. Kompaniya tomonidan ishlab chiqariladigan mahsulotlar o‘zining tejamkorligi va ekologik tozaligi bilan ajralib turadi. Jumladan, zamonaviy yoritish uskunalari 75 foizgacha bo‘lgan energiyani tejashga yordam beradi.

Muzokaralar chog‘ida T.Makarski O‘zbekistonda dastlabki bosqichda ishlab chiqarishni bosqichma-bosqich 40-50 foizgacha mahalliylashtirish bilan shahar yoritish moslamalarini ko‘p tarmoqli yig‘ishni tashkil etishga tayyor ekanligini bildirdi. Kiritiladigan sarmoyaning dastlabki miqdori 6-7 million AQSh dollarini tashkil etadi. Uchrashuv yakunlariga ko‘ra, quyidagi kelishuvlarga erishildi:

- elektr yoritish moslamalarini ishlab chiqarish bo‘yicha investitsiya loyihasini amalga oshirish;

- o‘zaro hamkorlikni yanada rivojlantirish bo‘yicha “Yo‘l xaritasi”ni birgalikda ishlab chiqish, uni tasdiqlash va hayotga tatbiq etish;

- kompaniya imkoniyatlarini sinash maqsadida Toshkent viloyati hokimligi tomonidan tanlangan yo‘lning 300 metr qismida LED texnologiyalarining afzalliklarini ko‘rsatishga qaratilgan tajriba loyihasini amalga oshirish;

- tegishli vazirlik, idoralar va hokimliklar rahbariyati bilan kelajakdagi rejalarni batafsil muhokama qilish maqsadida kompaniya delegatsiyasining O‘zbekistonga amaliy safarini tashkil qilish;

- kompaniyaning ishlab chiqarish imkoniyatlari, yoritish uskunalari va aqlli shahar texnologiyalari hamda tadqiqot va ishlanmalar markazi faoliyati bilan tanishish maqsadida O‘zbekiston delegatsiyasining Polshaga amaliy safarini uyushtirish.