«Vesna» markazi: Belarusda Machulishchidagi portlashlar tufayli odamlar hibsga olinyapti

Minskda 26 fevral kuni Rossiyaning A-50 erta ogohlantiruvchi va boshqaruvchi samolyotiga zarar yetkazilgan Machulishchi aerodromidagi portlashlar sababli qidiruv va hibsga olishlar ikkinchi kundan beri davom etmoqda. Bu haqda 5 mart, yakshanba kuni Belarusning «Vesna» inson huquqlari markazi o‘zining Telegram-kanalida ma’lum qildi.

Huquq himoyachilari ta’kidlaganidek, KGB xodimlari 2020 yildan 2023 yilgacha ma’muriy va siyosiy moddalar bo‘yicha jinoiy javobgarlikka tortilganlarning barchasini hibsga olyapti va tintuvlardan so‘ng odamlar KGB hibsxonasiga olib ketilyapti. «Vesna» markazi kamida o‘nlab bunday holatlardan xabardor. «Aftidan, ular «barmoq bilan osmonni ko‘rsatish» usulida harakat qilishyapti. Ular dronlari, yengil avtomashinalari borlar, Machulishchi yaqinida yashovchi odamlarning oldiga boryapti», deb yozadi «Nasha Niva» nashri guvohlarga tayanib.

Minsk yaqinidagi Machulishchi Belarus harbiy aerodromida 26 fevral kuni ertalab portlashlar sodir bo‘ldi. Sobiq Belarus xavfsizlik xodimlari uyushmasi - BYPOL xabariga ko‘ra, diversiya natijasida Ukrainadagi nishonlarga raketalarni yo‘naltirishda foydalanilgan Rossiyaning A-50 erta ogohlantirish va nazorat qilish uchun harbiy samolyotiga jiddiy zarar yetgan. BYPOL ma’lumotlariga ko‘ra, portlashlar natijasida A-50 samolyotining old va o‘rta qismlari, shuningdek, radiolokatsion antennasi shikastlangan. Bir necha kundan so‘ng, 3 mart kuni samolyot Taganrogdagi ta’mirlash zavodiga uchib ketgani ma’lum bo‘ldi.