London Putinning yadroviy keskinlashuv haqidagi so‘zlarini rad etdi

Buyuk Britaniya tashqi ishlar vaziri Jyeyms Kleverli Rossiya prezidenti Vladimir Putinning Ukrainaga tarkibida kuchsizlantirilgan uran bo‘lgan o‘q-dorilarni yetkazib berish bo‘yicha Londonga qo‘ygan ayblovlarini rad etdi. Putinning bir kun avvalgi so‘zlariga munosabat bildirar ekan, u 22 mart, chorshanba kuni Ukrainadagi urushda yadroviy keskinlashuv haqida gap ketmayotganini aytdi. 

«Hech qanday yadroviy keskinlashuv yo‘q. Dunyoda yadroviy muammolar haqida gapiradigan yagona davlat - bu Rossiya», - deya Kleverlining so‘zlaridan iqtibos keltirgan Reuters agentligi. 

Bir kun avval, 21 martda Britaniya Mudofaa vazirligi harbiy yordam doirasida Ukrainaga tarkibida kuchsizlantirilgan, ya’ni tabiiy urandan kamroq radioaktiv xususiyatga ega bo‘lgan o‘q-dorilar yetkazib berishini tasdiqladi. Bunday o‘q-dorilar o‘zining zichligi va boshqa jismoniy xususiyatlari tufayli tanklar va zirhli transport vositalariga osonroq zarar yetkaza oladi. Mudofaa vazirligi vakili shunday dedi: «Britaniya armiyasi o‘nlab yillar davomida zirhni teshuvchi raketalarida kuchsizlantirilgan urandan foydalanib keladi. Bu standart komponent bo‘lib, yadroviy qurolga hech qanday aloqasi yo‘q. Rossiya bundan xabardor, lekin ataylab noto‘g‘ri ma’lumot berishga harakat qilmoqda». Uning so‘zlariga ko‘ra, olimlar tomonidan olib borilgan mustaqil izlanishlar shuni ko‘rsatadiki, kuchsizlantirilgan uran o‘q-dorilaridan foydalanishning inson salomatligi va atrof-muhitga har qanday ta’siri past bo‘lishi mumkin.  

Xitoy rahbari Si Jinping bilan qo‘shma matbuot anjumani chog‘ida Putin bunday o‘q-dorilar yetkazib beriladigan bo‘lsa, Moskva «tegishli» javob qaytarishga majbur bo‘lishini ta’kidladi.