London Afg‘onistonda maxsus kuchlarining ehtimoliy qotilliklarini tekshiradi

Buyuk Britaniya Afg‘onistonda maxsus havo xizmati (SAS) harbiylari tomonidan sodir etilgan sudsiz qotilliklar yuzasidan tergov boshladi. Ular 50 dan ortiq ana shunday voqealarda gumon qilinmoqda, deb yozdi The Guardian.

Tergov Afg‘oniston janubidagi Hilmand viloyatida 2010 va 2011 yillarda halok bo‘lgan 54 nafar tinch aholining o‘limiga SAS bo‘linmasi a’zolarining aloqadorligi haqidagi ma’lumotlar paydo bo‘lishi ortidan boshlangan.

«Qonunni buzgan har qanday shaxs tergov uchun tegishli organlarga topshirilishi shart», dedi mustaqil tergovni boshlagan lord-sudya Heddon-Keyv. Shu bilan birga jinoyatlarda aybsiz bo‘lganlardan «ko‘plab shubhalarni» olib tashlash zarurligini ta’kidladi.

«Bu qurolli kuchlar obro‘si uchun ham, mamlakat uchun ham juda muhim», dedi sudya.

Tergov davomida «Tolibon» harakatidan dalil olish niyati, shuningdek, Afg‘onistondagi guvohlar bilan muloqot qilish bilan bog‘liq to‘siqlar haqida so‘ralganda, Heddon-Keyv o‘z jamoasi bilan birga «qo‘ldan kelgan barcha ishni» bajarishini ta’kidladi.

Ish bo‘yicha birinchi sud majlisi 25 aprel kuni Londonda bo‘lib o‘tadi. Yig‘ilishda «ko‘pchiligi maxfiy bo‘lgan minglab hujjatlar»ni tekshirish boshlanadi. Shundan so‘ng, harbiy amaliyotlar va Britaniya kuchlarining Afg‘onistondagi o‘rni bo‘yicha dastlabki brifinglar o‘tkaziladi.

Heddon-Keyv so‘zlariga ko‘ra, u mahkamalarni ochiq tarzda o‘tkazish tarafdori, ammo milliy xavfsizlik va guvohlarni himoya qilish zarurati ba’zi mahkamalarni yopiq eshiklar ortida o‘tkazishni talab qiladi.

Xususan, SAS kabi maxsus kuchlar a’zolarining ko‘rsatmalari haqida gap ketganda, sudya tergov guruhidan boshqa har qanday shaxsning sud majlisida ishtirok etishi «ilojsiz» ekanini aytdi.