Toshkentdagi yangi qurilgan ko‘p qavatli uylarning devori zilziladan so‘ng yorilib ketgani haqida xabarlar tarqaldi. Kun.uz hodisa joyiga borib, mutasaddilardan holat yuzasidan izoh oldi.
Yashnobod tumani hokimining qurilish masalalari bo‘yicha o‘rinbosari Izzatilla Ziyovuddinovga ko‘ra bino ikki yildan buyon shu holatda turibdi va fasad qismining ko‘chib tushishi 23 mart kuni tunda sodir bo‘lgan zilzila bilan bog‘liq emas.
“Bu loyiha Parkent Plaza-3 loyihasi bo‘lib, internetda tarqalgan videoning zilzilaga mutlaqo aloqasi yo‘q. Binoning fasadi ikki yildan beri mana shu holatda turibdi. Bino fasadidagi dekoratsiya tushib ketgani sababli uning joyini penoplast bilan yopib qo‘yishgan. Xodimlarimiz bilan uylarning ichlarini ko‘rib chiqdik, ichkarida hech qanday yoriqlar yo‘q.
Bu uylarni qurgan FDG kompaniyasi qurilish materiallarini olgan firma bilan sudlashib, sentabr oyida sudda yutib chiqishgan. Endi ular fasad o‘pirilib tushgan joylarni qaytadan to‘g‘rilab chiqishadi”, deydi Izzatilla Ziyovuddinov.
Rasmiylarning so‘zlariga ishonch hosil qilish maqsadida bir qator xonadonlarga kirib, u yerda yoriqlar bor-yo‘qligi, fasad qismining ko‘chib tushishi ichkariga ta’sir ko‘rsatgan yoki ko‘rsatmagani bilan qiziqdik.
Kuzatuvlarimiz davomida uylarning ichida hech qanday yoriqlar yoki darz ketish alomatlariga ko‘zimiz tushmadi. Qolaversa, shu yerda yashovchilar ham fasad ancha oldin o‘pirilib tushganini tasdiqlashdi.
