AQSh bo‘ylab halokatli tornado: o‘nlab odamlar halok bo‘ldi, shahar vayronaga aylandi 

25 mart kuni Amerika Qo‘shma Shtatlaridagi halokatli bo‘ron yigirmadan ortiq odamning hayotiga zomin bo‘ldi va shaharlardan birini butunlay vayron qildi. 

Co‘nggi ma’lumotlarga ko‘ra, tornado oqibatida 26 kishi halok bo‘lgan. Eng katta vayronagarchilik Missisipi va Alabama shtatlarida qayd etilgan: Kichik shaharlar va qishloqlar tabiiy ofatdan eng ko‘p jabr ko‘rgan. Bu hududlarda daraxtlar singan, uylar vayron bo‘lgan, elektr uzatish liniyalari jiddiy shikastlangan, o‘n minglab uylar toksiz qolgan. 

Kuchli yog‘ingarchilik davomida Missisipining janubiy hududlariga golf to‘pi hajmida do‘l tushgan.

Shtat g‘arbidagi Rolling Fork shaharchasi aholisi vakillari uylarning derazalari shamol kuchidan sinib ketganini aytishgan.

Bu hududdagi vayrongarchiliklar nisbatan eng jiddiysi bo‘ldi.

Rolling Fork shahri meri Eldrij Uoker CNN telekanalida tornado shaharni «yer yuzidan o‘chirib tashlangani» haqida aytdi. Bu yerda kamida 12 kishi halok bo‘lgan. 

«Mening shahrim endi yo‘q, lekin biz tirikmiz. Biz kuch to‘plab, qaytib kelamiz», dedi u. 

OAV xabariga ko‘ra, shamol tezligi soatiga taxminan 113 kilometrga yetgan, tornado yo‘lining umumiy uzunligi 160 kilometrdan oshgan. 

«Umrimda bunaqasini ko‘rmaganman. Bu ajoyib kichik shaharcha edi, endi esa u yo‘q», degan CNN muxbiriga intervyusida mahalliy aholi vakili Brendi Shova.

Naytlar oilasi - er-xotin va ularning uch yoshli qizi - Rolling Forkdagi qarindoshlarinikida mehmonga kelishgandi.

Kornel Nayt AP muxbiriga aytishicha, tornado arafasida hudud noodatiy tarzda o‘ta tinch bo‘lgan, osmon qoraygan, keyin esa har tarafda transformatorlar portlay boshlagan.

Uning so‘zlariga ko‘ra, tornado boshqa qarindoshining uyiga urilgan. U yerda devor qulagan va bir necha kishini bosib qolgan.

Qutqaruvchilarning aytishicha, ko‘pchilikni xarobalar ostidan chiqarib olishga to‘g‘ri kelgan.

Sharki okrugida bir necha politsiyachi bedarak yo‘qolgan deb hisoblanmoqda.

Missisipi shtati gubernatori Teyt Rivz tvitterdagi sahifasida qidiruv-qutqaruv guruhlari jabrlanganlarga birinchi yordamni ko‘rsatayotgani haqida yozgan.

«Bu kecha Missisipi deltasida ko‘pchilik sizning duolaringiz va xudoning panohiga muhtoj. Ob-havo ma’lumotlarini kuzatib boring va butun tun davomida ehtiyotkorlikni unutmang, Missisipi!» - deya yozgan u.

Favqulodda xizmatlar hodisa oqibatlarini bartaraf etish bilan shug‘ullanmoqda. Birgina Missisipi shtatida 17 mingga yaqin xonadon elektr ta’minotisiz qolgan. Qidiruv-qutqaruv ishlari davom etyapti.

Prognozlarga ko‘ra, tornado hamon Missisipi shtatining ayrim hududlariga xavf solmoqda.

AQSh janubidagi boshqa bir necha shtatlarda ham kuchli bo‘ronlarga tayyorgarlik ko‘rishmoqda.