Rossiya rasmiylari bilan bog‘liq akkauntlar tavsiyalar bo‘limida, qidiruv va ijtimoiy tarmoq lentasida yana paydo bo‘ladi. Ukrainada urush boshlanganidan keyin Twitter ularning profillariga cheklovlar kiritgandi.
Twitter ijtimoiy tarmog‘i tavsiyalar bo‘limida va qidiruv natijalarida yana Rossiya rasmiylariga aloqador akkauntlarni ko‘rsata boshladi. The Telegraph 8 aprel, shanba kuni bunga e’tibor qaratdi.
Sinov jarayonida jurnalistlar Twitter Rossiya prezidenti, TIV va Rossiyaning Buyuk Britaniyadagi elchixonasi sahifalarini algoritmik tasmada ko‘rsata boshlaganini aniqladi. TASS’ning aniqlik kiritishicha, ular orasida Rossiya Mudofaa vazirligining akkaunti ham paydo bo‘lgan.
Twitter sobiq top-menejyeri The Telegraph nashri bilan suhbatda bu Ukrainada urush boshlanganidan keyin kiritilgan cheklovlar bekor qilinishi natijasida ro‘y bergan bo‘lishi mumkinligini taxmin qildi. «Ushbu o‘zgarish tasodifan yoki kompaniya rahbariyatining xabarisiz sodir bo‘lganligi ehtimoldan yiroq», dedi u nashrga. Twitter akkauntlarni tavsiyalar bo‘limiga qaytarish sababini rasman izohlamadi.
2020 yildan beri Twitter, ijtimoiy tarmoq moderatorlari fikricha, ma’lum bir davlat rahbariyati bilan bog‘liq bo‘lgan ommaviy axborot vositalari va odamlarga maxsus belgi qo‘yadi. Rossiyaning Ukrainada harbiy harakatlari boshlanganidan so‘ng kompaniya «erkin ma’lumotlardan foydalanishni cheklovchi va qurolli davlatlararo mojarolarda ishtirok etuvchi davlatlarga tegishli» sahifalarni targ‘ib qilish va tavsiya etishni to‘xtatganini e’lon qildi.
