Moskvada armiyaga chaqirilganlarning yashash joyi videokuzatuv tizimi yordamida aniqlanyapti

Bundan tashqari, Rossiya Federatsiyasi poytaxti meri Sergey Sobyaninning ko‘rsatmasi bilan ish beruvchilar harbiy komissarliklarga chaqiriluvchilar haqida ma’lumot taqdim etishni boshladi, deb xabar berdi Moskva harbiy komissari Maksim Loktev TASS agentligiga bergan intervyusida. 

Uning so‘zlariga ko‘ra, fuqarolarning harbiy komissarlikka kelmasligining asosiy sababi ro‘yxatga olingan joydan tashqarida yashashidir. 

Hozir bu masalaga Sergey Sobyanin va Rossiya Ichki ishlar vazirligining Moskva bo‘yicha bosh boshqarmasi ko‘magida katta e’tibor qaratilmoqda, deya qo‘shimcha qildi Loktev.

Avvalroq Rossiya prezidenti Vladimir Putin harbiy xizmatga majbur bo‘lgan shaxslarning yagona reyestrini yaratish va elektron chaqiruv qog‘ozlarini joriy etish to‘g‘risidagi qonunni imzoladi. 

Reyestr davlat axborot resursi ma’lumotlari asosida harbiy komissarliklar tomonidan shakllantiriladi.

Harbiy xizmatni o‘tashga majbur bo‘lgan shaxslarga chaqiruv qog‘ozi olinganligi to‘g‘risida tilxat bilan yozma ravishda yoki buyurtma xati orqali yuborilishi mumkin. Elektron chaqiruv qog‘ozi davlat xizmatlari saytining shaxsiy kabinetiga joylashtirilgan paytdan boshlab topshirilgan hisoblanadi.

Agar chaqiruv qog‘ozi yozma yoki elektron shaklda topshirilmagan bo‘lsa, u reyestrga kiritilgan kundan boshlab yetti kun o‘tgach topshirilgan hisoblanadi.

Chaqiruv qog‘ozi olingan kundan boshlab 20 kun ichida harbiy komissarlikka kelmaganlarga cheklovlar qo‘yiladi. Shu tariqa, ularga yakka tartibdagi tadbirkor sifatida ro‘yxatdan o‘tish, transport vositalari va ko‘chmas mulkni ro‘yxatdan o‘tkazish, transport vositasini boshqarish huquqi rad etilishi, kredit berish esa taqiqlanishi mumkin.

Muddatli harbiy xizmatga chaqirilishi kerak bo‘lganlar chaqiruv qog‘ozini olgan kundan boshlab, harbiy komissarlikka kelguniga qadar Rossiyadan chiqib keta olmaydi.