Koreya Toshkentdagi Seul bog‘ini rekonstruksiya qilish uchun mablag‘ ajratadi

Shavkat Umrzoqov o‘zaro munosabatlar ikki davlat rahbarlarining oliy darajadagi uchrashuvlarida imzolangan hujjatlar va kelishuvlar asosida barqaror rivojlanayotganiga e’tibor qaratib, iqtisodiyot, sanoat, xizmat ko‘rsatish, tibbiyot, farmatsevtika, madaniyat, turizm, ta’lim, energetika va boshqa sohalarda hali ishga solinmagan imkoniyatlar ko‘p ekanligini qayd etdi. 

2022 yil yakuniga ko‘ra, Koreya va Toshkent o‘rtasidagi o‘zaro savdo hajmi 412 mln AQSh dollarini tashkil etganligini bildirib, ikki tomonda ham bu ko‘rsatkichlarni bir necha barobar oshirish imkoniyati katta ekanligini, buning uchun hozirda Koreyada turli sohalarda qo‘llanilayotgan innovatsiyalarni bizda ham joriy etish, o‘zaro tajriba va malaka almashishni tashkil etish muhimligini aytib o‘tdi.

Toshkent va Seul o‘rtasida yo‘lga qo‘yilgan birodarlik aloqalarini kengaytirish va shaharlarning birgalikdagi rivojlanish rejalarini amalga oshirish, Koreya biznesidagi yutuqlarni O‘zbekiston va Toshkentda qo‘llash ahamiyatli bo‘lishini ta’kidladi.

Elchi Kim Xi Sang qabul uchun minnatdorlik bildirib, O‘zbekiston va Toshkent bilan aloqalarni rivojlantirish Koreya Respublikasi uchun ham ustuvor ahamiyat kasb etishini bildirdi. Turli soha va yo‘nalishlardagi hamkorlik kengayib, rivojlanib borayotganiga e’tibor qaratib, hozirda O‘zbekistonda faoliyat yuritayotgan Koreya kompaniyalarining 50 foizdan ortig‘i Toshkentda ishlayotganligini qayd etdi. Bundan buyon ham mavjud aloqalarni kengaytirish, Koreyaning yetakchi firma va kompaniyalarini O‘zbekiston bozoriga olib kirish yo‘nalishida faol ishlashini bildirdi. 

Suhbat davomida Toshkentdagi Seul bog‘ini rekonstruksiya qilish  hamda investitsiya loyihalari samaradorligini oshirish masalasi alohida muhokama etildi. 

Kim Xi Sang joriy yilda Seul shahri meriyasi tomonidan bog‘ni qayta ta’mirlash uchun 340 ming AQSh dollari, Koreya Tashqi ishlar vazirligi tomonidan esa 152 ming AQSh dollari miqdorida mablag‘ ajratish rejalashtirilayotganligini bildirib, bu ishlar o‘z muddatida, yuqori sifatda bajarilishi uchun Toshkent shahri hokimligining amaliy yordami muhimligini qayd etdi.  

Shuningdek, Koreya investitsiyasi asosida ishga tushishi mo‘ljallangan markaz faoliyatining tashkiliy-huquqiy masalalarini bayon etdi.

Shavkat Umrzoqov Seul bog‘i ikki mamlakat do‘stligi ramzi ekanligiga e’tibor qaratib, qayta ta’mirlash ishlari boshlanguniga qadar ham bog‘ni tartibga keltirish ishlari amalga oshirilishi va rekonstruksiya jarayonida ham zarur amaliy yordam ko‘rsatilishini bildirdi. Shu bilan birga, investitsiya sohasidagi hamkorlikni har tomonlama rivojlantirish uchun Toshkent bor imkoniyatlarini ishga solishini bildirib, ikki tomon –  Koreya Respublikasi va Toshkent shahar hokimligining mas’ullaridan iborat ishchi guruhini tashkil etish orqali turli sohalarda rivojlanish istiqbollarini birgalikda ko‘rib chiqib, yangi loyihalarni ishga tushirish yuzasidan rejalarni ishlab chiqish va amalga oshirish taklifini bildirdi.

Koreya elchisi bu taklifni to‘la qo‘llab-quvvatladi. Tomonlar amaliy muloqotlar davom etishini bildirishdi.