Yevropada Ikkinchi jahon urushi tugaganining 78 yilligi munosabati bilan Germaniya poytaxtida huquq-tartibot idoralari xodimlari Rossiyaning Ukrainaga qarshi urushini oqlash sifatida baholanishi mumkin bo‘lgan harakatlarning oldini oladi.
Berlin rasmiylari G‘arb davlatlarida 8 may kuni nishonlanadigan Yevropada Ikkinchi jahon urushi tugaganining 78 yilligi va Rossiyada 9 may – G‘alaba kuni munosabati bilan yuzaga kelishi mumkin bo‘lgan provokatsiyalarning oldini olish niyatida. Germaniya poytaxtidagi sovet harbiy yodgorliklari himoya ostida bo‘ladi, deb xabar qildi Berlin politsiyasi 5 may, juma kuni.
Shu bilan birga, Rossiyaning Ukrainaga qarshi urushini ma’qullash sifatida qabul qilinadigan har qanday harakatlar bostiriladi. Bir yildan ortiq davom etayotgan urush demokratik munozaralar doirasidan chiqmasligi va nizo yoki to‘qnashuvlarga olib kelmasligi kerak, deya ta’kidladi politsiya.
Memorial majmualar va yodgorliklar hududida 8 va 9 may kunlari Rossiya va Ukraina bayroqlarini, Georgiy lentalarini, harbiy kiyimlarni yoki ularning elementlarini namoyish qilish taqiqlanadi. Bundan tashqari, mashqlar yoki harbiy qo‘shiqlarni ijro etish man qilinadi. Taqiq, shuningdek, mavjud vaziyatni hisobga olgan holda, Ukrainadagi urushni oqlash yoki maqtash deb qabul qilinishi mumkin bo‘lgan har qanday shiorlarni o‘z ichiga oladi, deya tushuntirdi Berlin rasmiylari.
Shunga o‘xshash choralar 2022 yilda ham qo‘llanilgan. Qaror Ikkinchi jahon urushi qatnashchilari va diplomatlarga taalluqli emas. Shu bilan birga, cheklovlar yodgorliklardan tashqarida joylashgan hududlarga taalluqli emas: u yerda yig‘ilishlar erkinligi to‘g‘risidagi Berlin qonunining qoidalari qo‘llaniladi.
2022 yil 24 fevralda Rossiyaning Ukrainaga qarshi keng ko‘lamli harbiy harakatlari boshlanganidan so‘ng, Germaniyada Yevropani natsizmdan ozod qilishda halok bo‘lgan sovet harbiy xizmatchilariga bag‘ishlangan bir nechta yodgorlik joylari tahqirlandi.
