Meta korporatsiyasi Yevropa Ittifoqi sudining Facebook foydalanuvchilari ma’lumotlarini AQShga o‘tkazishni taqiqlovchi qaroriga rioya qilmadi, deb xabar berdi DPC Irlandiya idorasi. Jarima 1,2 milliard yevroni tashkil etdi.
Amerikaning Facebook ijtimoiy tarmog‘ini o‘z ichiga olgan Meta Platforms korporatsiyasi bilan shaxsiy ma’lumotlarni himoya qilish bo‘yicha mojaroda Yevropa Ittifoqi rekord darajada jarima solishga qaror qildi. 22 may, dushanba kuni Irlandiyaning Ma’lumotlarni himoya qilish komissiyasi (DPC) foydalanuvchilarning shaxsiy ma’lumotlariga noto‘g‘ri munosabatda bo‘lganligi sababli kompaniyani 1,2 milliard yevro miqdorida jarimaga tortish qarorini e’lon qildi. Bayonotda aytilishicha, Yevropa Ittifoqi sudi oldingi qaroriga qaramay, Meta yevropalik foydalanuvchilarning “asosiy huquq va erkinliklari uchun xavflarni bartaraf eta olmadi” va ularning ma’lumotlarini AQShga berishda davom etmoqda.
Bu Yevropada shu vaqtgacha solingan eng katta jarima bo‘lib, Amazon’ga 2021 yilda qo‘yilgan avvalgi maksimal jarima - 746 million yevrodan sezilarli darajada oshib ketdi.
O‘z navbatida, Meta rahbariyati "sanoqsiz boshqa kompaniyalar uchun xavfli pretsedent" yaratib, "asossiz va keraksiz jazo" haqida e’lon qildi va bu qaror ustidan shikoyat qilish niyatini bildirdi.
Meta kompaniyasining Yevropa shtab-kvartirasi Dublinda joylashgan, shuning uchun korporatsiyaning Yevropa qonunchiligiga muvofiqligi Irlandiya DPC zimmasiga yuklanadi. 2020 yildan boshlab idora Facebook’da ro‘yxatdan o‘tgan yevropaliklarning shaxsiy ma’lumotlarini AQShga berish muammosi bilan shug‘ullanadi. U korporatsiyaga bunday amaliyotlarni to‘xtatish uchun besh oylik muddat berdi.
