Banklar uchun qanday mulk zarur hisoblanmasligi belgilandi

Markaziy bank boshqaruvi tomonidan “Tijorat banklari tomonidan ko‘chmas mulkni va boshqa mol-mulkni sotib olishga hamda unga egalik qilishga, shuningdek yuridik shaxslarning ustav fondidagi (ustav kapitalidagi) ulushlarini yoki aksiyalarini sotib olishga qo‘yiladigan talablar to‘g‘risidagi nizomni tasdiqlash haqida” qaror qabul qilindi.

Bank faoliyatini amalga oshirish uchun zaruriyati mavjud bo‘lmagan (foydalanilmaydigan) ko‘chmas mulk va boshqa mol-mulklarga quyidagilar kiradi:

• sotib olingan yer;
• garov hisobidan undirilgan ko‘chmas mulk va boshqa mol-mulklar;
• kredit va lizing bo‘yicha undirilgan tugatilayotgan bankrot korxonalar ko‘chmas mulki va boshqa mol-mulklari;
• ijara daromadini olish va kapital o‘sishi uchun yoki har ikki maqsad uchun mo‘ljallangan ko‘chmas mulklar;
• bank faoliyatini amalga oshirish uchun sotib olingan, biroq bank faoliyatida va (yoki) mulkka qilingan investitsiya sifatida 3 yildan ortiq muddatda foydalanilmayotgan ko‘chmas mulk va boshqa mol-mulklar.  

Banklar bank faoliyatini amalga oshirish uchun zaruriyati mavjud bo‘lmagan (foydalanilmaydigan) mulkni 3 yil ichida sotish choralarini ko‘rishi yoki ulardan foydalanish to‘g‘risida qaror qabul qilishi zarur.

Banklar mulkni, shuningdek sotib olingan yuridik shaxslarning ustav kapitalidagi ulushlarini yoki aksiyalarining hisobini yuritishi va bu to‘g‘risidagi hisobotlarni har oyda Markaziy bankka taqdim etib borishi lozim.