Farg‘onaning ikki tumanida yangi quyosh elektr stansiyasi ishga tushiriladi 

Viloyat aholisining elektr ta’minotini yaxshilash maqsadida, 8 ming kilometr tarmoq va 2 mingta transformator yangilanadi. 10 ming kilometr yo‘llar va 170 ta ko‘prik ta’mirlanadi. 

Prezidentlikka nomzod Shavkat Mirziyoyev farg‘onalik saylovchilar bilan uchrashuvda infratuzilmani yaxshilash borasidagi rejalar haqida ham ma’lumot berdi, deya xabar qilmoqda Kun.uz muxbiri.

“Xitoyning 900 million dollar investitsiyasi hisobiga, O‘zbekiston va Beshariq tumanlarida 900 Megavattli quyosh elektr stansiyalari ishga tushiriladi.

Bundan tashqari, 5 ming kilometr suv tarmoqlari hamda 900 ta suv inshooti barpo etiladi va ta’mirlanadi. Natijada 2030 yilga borib, viloyatda aholini toza ichimlik suvi bilan ta’minlash darajasi 76 foizdan 96 foizga yetkaziladi”, dedi Shavkat Mirziyoyev.