Ijtimoiy tarmoqlarda bundan buyon oilaviy poliklinikada ro‘yxatdan o‘tmagan fuqarolarga xizmatlar pulli bo‘lishi haqida xabar tarqaldi. Sog‘liqni saqlash vazirligi matbuot xizmati bu xabarga raddiya berdi.
Qayd etilishicha, Toshkent shahridagi tibbiyot muassasalarida davlat tibbiy sug‘urtasi mexanizmlarini joriy etish jarayonida oilaviy poliklinika xodimlari fuqarolardan shaxsiy hujjat ma’lumotlarini talab qilinayotgani ayrim shaxslar tomonidan boshqacha talqin qilingani aholi o‘rtasida mish-mish tarqalishiga olib kelgan.
“Afsuski, so‘nggi kunlarda davlat tibbiy sug‘urtasi mexanizmlarining mohiyati to‘liq anglab yetilmasdan jamoatchilik orasida "endi oilaviy poliklinika xizmatlari pulli bo‘lar ekan", degan noto‘g‘ri tushuncha paydo bo‘lmoqda.
Avvalo shuni aytish kerakki, poliklinikada ro‘yxatdan o‘tmagan aholiga pulli xizmatlar ko‘rsatilishi haqida internetda tarqalgan xabarlar mutlaqo asossiz. Normativ hujjatlarga ko‘ra, respublikaning barcha fuqarolariga davlat tomonidan kafolatlangan tibbiy xizmatlar bepul taqdim etiladi.
Buning uchun fuqaro endilikda oilaviy shifokor qabuliga kelgan vaqtda shaxsiy hujjatlari ma’lumotlari asosida bir marta identifikatsiyadan o‘tishi lozim. Ya’ni “Elektron poliklinika”ga ma’lumotlarni kiritish uchun fuqaro shaxsini tasdiqlovchi xujjatni taqdim etishi zarur”, deyiladi vazirlik raddiyasida.
Ta’kidlanishicha, 2023 yil 1 iyuldan Toshkent shahridagi tibbiyot muassasalarida davlat tibbiy sug‘urtasi tizimi mexanizmlarini joriy etish belgilangan. Buning uchun poytaxtdagi 71 ta oilaviy poliklinika, 12 ta ko‘p tarmoqli markaziy polikliklinika va 40 ta shifoxona kompyuter jihozlari, zarur tibbiy uskunalar bilan ta’minlanib, tibbiyot muassasalarini to‘liq raqamlashtirish uchun barcha sharoitlar yaratilgan.
“Mazkur tizim ishga tushgach, fuqarolar davlat budjeti mablag‘lari doirasida kafolatlangan tibbiy xizmatdan foydalanish imkoniga ega bo‘ladi. Ya’ni elektron bazaga har bir fuqaro (bemor)ning shaxsiy ma’lumotlari, tashxisi, kasalliklari, olgan muolajalari haqida to‘liq ma’lumotlar kiritilib, shifokor shu asosda bemorni nazoratga oladi va profilaktika hamda davolash choralarini ko‘radi. Qolaversa, bemorlar dorilarni elektron usulda ham olishi mumkin. Natijada oilaviy poliklinikalardagi navbatlarning oldi olinib, qatnovlar soni kamayadi”, deyiladi SSV xabarida.
