Hatay aholisiga O‘zbekiston fuqarolari mablag‘i hisobidan sotib olingan modulli uylar topshirildi

Turkiyaning Hatay provinsiyasida O‘zbekiston fuqarolari, jumladan, ushbu mamlakatda mehnat qilayotgan fuqarolar hisobidan sotib olingan va jihozlangan 57 ta modulli uylarni provinsiya aholisiga topshirish marosimi bo‘lib o‘tdi, deb xabar bermoqda «Dunyo».

Foto: Instagram / izzettinyilmaztr

Tadbir davomida o‘zbekistonlik diplomatlar joriy yil 6 fevral kuni «asr falokatini» boshidan kechirgan turk xalqiga yana bir bor chuqur hamdardlik bildirdi. Fojianing birinchi kunidan boshlab o‘zbek xalqi turk birodarlariga yordam qo‘lini cho‘zishgani, Qurbon hayiti arafasida mustahkam uy-joy qurishdan oldin ushbu masalaning eng yaxshi yechimi bo‘lgan konteynerlarni topshirish o‘zaro qon-qarindoshlik rishtalarini yana bir karra tasdiqlagani ta’kidlandi.

Prezident Shavkat Mirziyoyevning Hatay provinsiyasini tiklash, jumladan, yaqin do‘stlik va hamjihatlikning yana bir yorqin timsoliga aylanadigan yangi uy-joylar hamda boshqa infratuzilma obektlarini barpo etish borasidagi tashabbusiga alohida e’tibor qaratildi.

Tadbir davomida O‘zbekiston diplomatlari Ovakent tumanida yashayotgan etnik o‘zbeklarning savollariga batafsil javob berdi.