“Kuzatuvchilar, partiya vakillari va boshqa fuqarolik jamiyati institutlaridan e’tirozlar kelib tushmadi” – Bosh prokuratura

“Kuni kecha o‘tkazgan matbuot anjumanimizdan so‘ng saylov ishtirokchilaridan qonunbuzilishi holati mavjudligini tekshirib ko‘rish uchun jami 5 ta xabar va murojaat kelib tushdi. Ushbu murojaatlar Jizzax, Qashqadaryo, Navoiy, Samarqand va Sirdaryo viloyatlari hisobiga to‘g‘ri keldi.

Aytib o‘tishim kerak, ularning barchasi fuqarolarning prokuratura organlaridagi 1007 raqamli ishonch telefoniga qilgan murojaatlari hisoblanadi. O‘rganishlar natijasida qayd etilgan holatlarning 1 tasi o‘z tasdig‘ini topmagan bo‘lsa, qolgan 4 tasi bo‘yicha murojaat etgan fuqaroga tushuntirish berildi.

Albatta, ushbu murojaatlar tezkor ko‘rib chiqilib, barcha masalalar joyida hal etildi. Shu o‘rinda, ushbu fuqarolarimizga ham faolligi uchun alohida minnatdorchilik bildiramiz”, deya Shohrux Aminovning so‘zlarini keltirmoqda Kun.uz muxbiri.

Bosh prokuratura mulozimiga ko‘ra, siyosiy tadbirda qonun ustuvorligini ta’minlash uchun 3 mingga yaqin xodimlarimiz safarbar etilgan, 218 nafar alohida tayyorlangan xodimlardan tarkib topgan Bosh prokuratura va hududiy prokuraturalardagi Ishchi guruhlar tizimli ravishda ish olib borgan.

Xususan, saylovga doir ma’lumotlarni monitoring qilish va qonunbuzilishi holatlarini aniqlashga qaratilgan tadbirlar doirasida Internet butunjahon axborot tizimi hamda ijtimoiy tarmoqlarda e’lon qilingan 1100 dan ortiq xabarlar o‘rganildi, ommaviy axborot vositalarining ma’lumotlari sinchkovlik bilan kuzatib borilgan.

Xalqaro tashkilotlar vakillari hamda keng jamoatchilik bilan yaqindan hamkorlik o‘rnatilib, ma’lumotlar uzluksiz almashilgan. Markaziy saylov komissiyasi va boshqa mutasaddi idoralar bilan tezkor muloqot o‘rnatilib, o‘zaro axborot almashinuvi amalga oshirilgan. Shuningdek, prokuratura organlarining barcha bo‘g‘inlarida tashkil etilgan 24 soatlik uzluksiz navbatchilikda 500 ga yaqin xodimlar xizmat olib borgan. Hududlardagi vaziyat haqida real vaqt rejimida axborotlar olib turilgan.

“Ta’kidlamoqchimanki, kuzatuvchilar, partiya vakillari va boshqa fuqarolik jamiyati institutlaridan ham e’tirozlar kelib tushmadi. Hozirga qadar o‘tkazilgan o‘rganishlar natijasiga ko‘ra, saylov jarayonida jiddiy qonunbuzilishlarga yo‘l qo‘yilganligi aniqlanmadi.

Tahlillarimiz, nazorat tadbirlari, kuzatuv va monitoringlarimizdan kelib chiqib, saylovda qonuniylik to‘laqonli ta’minlandi, deb hisoblashga barcha asoslarimiz bor. Albatta, saylovda qonuniylik yuqori darajada ta’minlanishiga bir qator omillar o‘zining ijobiy ta’sirini ko‘rsatdi.

Bunda eng asosiy omillardan biri qonunbuzarliklarni aniqlash va aybdorlarni tegishli javobgarlikka tortishga emas, balki bunday holatlarning oldini olishga ustuvor ahamiyat qaratilgani bo‘ldi.

Bir so‘z bilan aytganda, ushbu muhim siyosiy tadbirning tinch va osoyishta o‘tishi, hududlarda va saylov uchastkalarida jamoat tartibiga rioya qilinishi ta’minlandi. Eng muhimi, har bir fuqaroning saylov bilan bog‘liq konstitutsiyaviy huquqlarini to‘laqonli ro‘yobga chiqarishga, ularning o‘z xohish-irodasini erkin ifoda etishiga erishdik, deb qat’iy ishonch bilan ayta olamiz”, deydi Shohrux Aminov.

Ta’kidlanishicha, jismoniy imkoniyatlari cheklangan shaxslarga o‘z huquqlarini amalga oshirish uchun saylov uchastkalari ko‘chma saylov qutilari, brayl alifbosidagi saylov byulletenlari bilan ta’minlangan, panduslar o‘rnatildi, surdo tarjimonlar faoliyati yo‘lga qo‘yilgan.

Avvalroq O‘zbekiston Oliy sudi raisining o‘rinbosari Xalilullo Turaxo‘jayev saylov jarayonida hech qanday qonunbuzarliklar aniqlanmagani, sudlarga shikoyatlar kelib tushmaganini ma’lum qilgandi.

Eslatib o‘tamiz, O‘zbekistonda 9 iyul kuni bo‘lib o‘tgan navbatdan tashqari prezidentlik saylovining dastlabki natijalariga ko‘ra, unda ishtirok etgan 15,6 mln kishining 13 mln 625 mingdan ortig‘i Shavkat Mirziyoyevga ovoz bergan. MSK raisi rasman Shavkat Mirziyoyevni O‘zbekiston prezidenti etib saylangani bilan tabrikladi.