Prezident maxsus vakili Jyenevada JSTga a’zo bo‘lishni jadallashtirish masalasini muhokama qildi

Mamlakatning Jyenevadagi BMT bo‘linmasi va boshqa xalqaro tashkilotlardagi doimiy vakolatxonasi ma’lumotiga ko‘ra, tashrif tashkilotga a’zo davlatlarni O‘zbekiston prezidentining «O‘zbekistonning Jahon savdo tashkilotiga a’zo bo‘lish jarayonini jadallashtirishga doir qo‘shimcha chora-tadbirlar to‘g‘risida»gi qaroriga muvofiq mamlakatning JSTga a’zo bo‘lish jarayonlarini faollashtirish bo‘yicha amalga oshirilayotgan ishlar natijalari bilan tanishtirish, Ozarboyjonning JSTga a’zo bo‘lish bo‘yicha ishchi guruhi 15-yig‘ilishida ishtirok etish maqsadida tashkil etildi.

Tashrif doirasida O‘zbekiston delegatsiyasi JST bosh direktori Ngozi Okonjo–Iveala, uning o‘rinbosari Syanchen Chjan bilan uchrashdi. Lotin Amerikasi, Osiyo-Tinch okeani mintaqasi, Yevropa va arab dunyosining ayrim mamlakatlari bilan tovar va xizmatlar bozoriga chiqish bo‘yicha qator ikki tomonlama muzokaralar o‘tkazildi.

Ngozi Okonjo–Iveala JST tashkilotga a’zo davlatlar bilan ikki tomonlama va ko‘p tomonlama muzokaralarni qo‘llab-quvvatlash maqsadida O‘zbekistonga texnik ko‘makni kengaytirishga tayyorligini bildirdi. Shu nuqtayi nazardan, tomonlar bir qator xalqaro maslahatchilardan ekspert yordamini jalb qilish imkoniyatlarini muhokama qildi.

Tashrif davomida delegatsiya JST kotibiyati bilan birgalikda O‘zbekistonning JSTga a’zo bo‘lishi bo‘yicha ishchi guruhi 7-yig‘ilishini shartli ravishda 2023 yil sentabr-oktyabr oylarida o‘tkazish uchun barcha fundamental hujjatlar to‘plamini tayyorladi.