Eldor Shomurodov «Roma»ni tark etib, yangi mavsumni A Seriyaning boshqa jamoasida boshlashi mumkin.
Insayder va jurnalist Janluka Di Marsio xabariga ko‘ra, A Seriya debyutanti «Kalyari» klubi rimliklar bilan o‘zbekistonlik hujumchi masalasida muzokaraga kirishgan. Qayd etilishicha, Klaudio Raneri murabbiyligidagi jamoa Shomurodovni sotib olish huquqi bilan ijaraga olmoqchi. Tomonlar kelishuvga erishilishiga ishonishmoqda.
Italiyalik 71 yoshli taniqli mutaxassis yanvar oyida «Kalyari» bosh murabbiyiga aylangach, B Seriyada 14-o‘rinda borayotgan klubni yarim yil ichida peshqadamlar safiga ko‘tarib, mavsum yakunida pley-off orqali A Seriyaga olib chiqishga muvaffaq bo‘ldi. Raneri A Seriya yangi mavsumi oldidan jamoasi tarkibini kuchaytirishni rejalashtirgan.
Avvalroq, Shomurodov Joze Mourinoning yangi mavsum uchun rejalaridan o‘rin olmagani, unga Italiyaning «Lechche» va Ispaniyaning «Jirona» klubi qiziqish bildirayotgani haqida xabar tarqalgandi.
Eslatib o‘tamiz, Shomurodov o‘tgan mavsumning ikkinchi qismini ijara asosida «Spetsiya»da o‘tkazib, 16 o‘yinda bitta gol va 2ta assistga mualliflik qilgandi.
