Odessadagi vayrongarchiliklar va texnikalarni frontda ta’mirlayotgan mexaniklar. Urush suratlari

Ukrainada urushning 514-kuni o‘tdi. Asosiy ma’lumotlar:

• Anneksiya qilingan Qrimdagi Krasnogvardeyskiy rayonida o‘q-dori omboriga dronlar hujum qildi.
• Rossiya nashrlarining bir guruh xodimlari Zaporijjya oblastining anneksiya qilingan qismida artilleriya zarbasi ostida qoldi. RIA Novosti korrespondenti Rostislav Juravlev halok bo‘lgan, yana uch xodim yaralangan. RF mudofaa vazirligi jurnalistlarlar bo‘lgan joy kassetali o‘q-dorilar bilan o‘qqa tutilgani haqida xabar bergan.
• Deutsche Welle nashri ham mediakompaniya operatori Donetsk oblasti kassetali o‘q-dorilar bilan o‘qqa tutilishi oqibatida yaralanganini ma’lum qildi.
• Moskva oblastida qurollangan shaxs xususiy uyga qamalib oldi va politsiyachilarga o‘q uzdi. U urushdan qaytib kelgani va Kremlga borishga tayyorligini aytgan. Shturm vaqtida uni otib o‘ldirishgan.
• Prigojin Belarusning Mogilev oblastida kompaniyasini ro‘yxatdan o‘tkazdi. Vagnerchilar Rossiyadagi isyondan keyin borib joylashgan lager ham shu oblastda joylashgan.

Kun kadri. Odessa yaqinidagi g‘alla omborining zarbadan keyingi ko‘rinishi

RF qo‘shinlari Qrim ko‘prigida 17 iyul kuni ro‘y bergan portlashga javoban Ukrainaning janubiy regionlarini o‘qqa tutishda davom etmoqda. 21 iyulga o‘tar kechasi rossiyalik harbiylar Odessa oblastidagi agrokorxonalardan birining g‘alla terminaliga raketa zarbasi yo‘lladi.

Ukraina qurolli kuchlari «Janub» operativ qo‘mondonligi rasmiysi Natalya Gumenyukning so‘zlariga ko‘ra, «Kalibr» rusumli raketalar Qora dengiz akvatoriyasida turgan kemadan uchirilgan. Shu kuni RF mudofaa vazirligi Qora dengizda «kemalar qatnovi vaqtincha yopilgan hududni ihotalash» bo‘yicha mashg‘ulot o‘tkazilgani haqida xabar bergandi. Vazirlikdan ma’lum qilishlaricha, «RFga qarshi terrorchilik aktlari tayyorlanayotgan» obektlar bo‘ylab navbatdagi zarbalar yo‘llangan.

«Suspilne» nashri xabariga ko‘ra, hujum oqibatida ikki kishi jarohat olib, 100 tonna no‘xat va 20 tonna arpa yo‘q qilingan.

Kunning asosiy voqeasi. Odessaga zarba va Spaso-Preobrajyenskiy soborining bir qismi vayron bo‘lishi

23 iyulga o‘tar kechasi ham Rossiya Odessa bo‘ylab yoppasiga raketa zarbalari yo‘lladi. Ukraina qurolli kuchlari xabariga ko‘ra, turli tipdagi 19 raketa uchirilgan, shundan 9 tasini urib tushirishga muvaffaq bo‘lingan. Zarba oqibatida kamida oltita turar joy binosi, jumladan ko‘p kvartirali uy shikastlangan, port infratuzilmasi qisman vayron bo‘lgna, shuningdek o‘nlab avtomobillar jabr ko‘rgan. Odessa oblasti harbiy ma’muriyati rahbari Oleg Kiperning xabar qilishicha, tungi hujum vaqtida tinch aholi vakillaridan bir kishi halok bo‘lib, 19 kishi, jumladan to‘rt nafar bola yaralangan. 14 kishi shifoxonaga yotqizilgan.

Raketalar Odessadagi eng yirik pravoslav ibodatxonasi — Ukraina pravoslav cherkovining Spaso-Preobrajyenskiy kafedral soboriga ham kelib urilgan. Ibodatxona binosi jiddiy shikastlangan, uning janubi-sharqiy qismi vayron bo‘lgan, raketa kelib tushgan joyda yong‘in chiqqan. «Pravoslav ziyoratgohlari zarar ko‘rdi: xarobalar ostidan Odessa homiysi sanalgan Bibi Maryamning Kasperovskaya ikonasi olib chiqildi», — deyiladi shahar ma’muriyati xabarida. «Vayrongarchilik ko‘lami ulkan, raketa o‘ng tomonga urilgan va birinchi qavatgacha qulatgan. Soborning yarmi tomsiz qoldi. Markaziy ustunlar, poydevor vayron bo‘lgan. Barcha derazalar oynalari, ganchkorlik naqshlari to‘kilib tushgan. Yong‘in chiqqan, cherkovning ikona va shamlar sotilgan bir qismi yongan», — degan «Suspіlne» nashriga Ukraina provaslav cherkovi Odessa yeparxiyasi kliriki (ruhoniy), arxidiakon Andrey Palchuk.

Donetsk o‘qqa tutilishi

«Grad» raketalarini otish uchun qo‘lbola yasalgan qurilma oldidagi ukrain askarlari

Ukrainalik jangchilar front chizig‘i yaqinida g‘arb yetkazib bergan harbiy texnikalarni ta’mirlamoqda

Yaqinda Politico jurnaliga bergan intervyusida AQSh mudofaa vazirining xaridlar va ta’minot bo‘yicha o‘rinbosari Uilyam Laplante g‘arblik ittifoqchilari Ukrainaga yordam berishda taktikani o‘zgartirgani, endi urg‘u yangi texnikalar yetkazib berishga emas, oldinroq Ukraina qurolli kuchlari uchun yetkazib berilgan texnikalarga xizmat ko‘rsatish va ularni ta’mirlashga qaratilayotganini aytgandi.

Buning uchun Yevropada yangi ta’mirlash korxonalari ochilmoqda (shunday korxonalardan biri Polshada ishlamoqda), butlovchi qismlar yetkazib berish yo‘lga qo‘yilmoqda, texnik hujjatlar ukrain tiliga o‘girilmoqda. Ukrainaning yozgi qarshi hujumiga tayyorlanish vaqtida turli mamlakatlardan keng assortimentdagi qurollar yetkazib berilgandi va bu texnikalarning barchasi qo‘llab-quvvatlash, texnik xizmat ko‘rsatish va ta’mirlashni talab etadi — hozirda bu ish ko‘pincha to‘g‘ridan to‘g‘ri jang maydonida, front chizig‘i yaqinida, ukrainalik mexanik muhandislar qo‘li bilan amalga oshirilmoqda. 

Front bo‘yidagi Gulyaypole shahri hayoti

Zaporijjya oblastining urushga qadar 13 mingdan ko‘proq kishi yashagan bu shahri anarxist va 1917-1922 yillardagi fuqarolik urushi qatnashchisi Nestor Maxnoning vatani sifatida ma’lum. Rossiyaning keng ko‘lamli bosqini boshlangach, Gulyaypole tez-tez o‘qqa tutiladi — mahalliy rasmiylarga ko‘ra, hozirda bu yerda uch mingga yaqin kishi qolgan. Gulyaypoledan Rossiya qo‘shinlari okkupatsiyasi ostidagi Dorojnyanka qishlog‘igacha masofa olti kilometrdan ortiq.

Ozod etilgan Novodarovka

Gulyaypoledan taxminan 40 kilometr masofada, Zaporijjya va Donetsk oblastlari chegarasida Novodarovka qishlog‘i joylashgan. Novodarovka bir yildan oshiq vaqt davomida rossiyalik harbiylar nazorati ostida edi, iyun oyi o‘rtalarida Ukraina qurolli kuchlari ushbu hududdagi bir qancha aholi yashash manzillari qatori ushbu qishloqni ham ozod etdi.