Saudiyaga yulduzlar oqimi davom etmoqda, «MYu» hujumchi olmoqda. So‘nggi transfer xabarlari
|23:56 / 30.07.202340 92714 min
«Real» Kilian Mbappe bo‘yicha uzil-kesil bir qarorga kelgan.
Foto: Getty ImagesFoto: Getty Images
Yozgi transferlar davom etmoqda, yana bir qator futbolchilar o‘zlariga yangi klub topishdi, yana bir qancha transferlar hal bo‘lishi kutilmoqda. Quyida so‘nggi kunning eng qiziqarli transfer xabarlari dayjesti.
So‘nggi kunlarda amalga oshirilgan transferlar
Mahrez «Al-Ahli»ga o‘tdi
«Manchester Siti» jazoirlik havbek Riyoz Mahrez Saudiya Arabistonining «Al-Ahli» klubiga o‘tganini e’lon qildi.
Ayni vaqtda 32 yoshda bo‘lgan futbolchi 2018 yilda «Lester»dan transfer qilingan va so‘nggi olti yilni «Manchester Siti»da o‘tkazgandi.
«Shaharliklar» futbolchi transferi uchun 35 million yevro olgan, shuningdek bonuslar va’da qilingan. Mahrezning o‘zi «Al-Ahli» bilan 2027 yilga qadar amal qiluvchi shartnomaga imzo chekkan. Ushbu klub bungacha darvozabon Eduard Mendi («Chelsi») va hujumchi Roberto Firminoni («Liverpul») o‘z safiga qo‘shib olgandi.
«PSJ» Ikardini «Galatasaroy»ga sotdi
Argentinalik forvard Mauro Ikardi «Galatasaroy» klubining to‘laqonli a’zosiga aylandi. «PSJ» 30 yoshli hujumchisi uchun 10 million yevro ishlab olgan.
Ikardining o‘zi turklar klubi bilan uch yillik shartnoma tuzdi. 2020 yilda «PSJ» Ikardini «Inter»dan 58 million yevro evaziga transfer qilgandi.
Futbolchi so‘nggi bir mavsumni «Galatasaroy»da o‘tkazgan va jamoaga Superligada g‘olib chiqishda yordam bergandi. Turkiyaning amaldagi chempioni kuchli tarkib yig‘moqda, Ikardidan tashqari, Anxelino, Torreyra, Mertens, Mata, Zaha, Bakambu ham jamoada.
Kavani «Boka Xuniors»ga o‘tdi
Urugvaylik hujumchi Edinson Kavani «Valensiya»ni tark etdi. U ispan klubi bilan shartnomani bekor qilishga erishgan (shartnoma tugashiga yana bir yil bor edi).
Eng yaxshi yillarini «Napoli» va «PSJ»da o‘tkazgan 36 yoshli futbolchi endi «Boka Xuniors» uchun to‘p suradi.
Urugvaylik futbolchi Argentina klubi bilan 2024 yilga qadar amal qiluvchi shartnomani imzolagan.
Mavzuga oid
«Ayaks» yulduzi APLning o‘rtamiyona klubida
Londonning «Fulhem» klubi kishi bilmas tarzda ajoyib transfer amalga oshirdi. APLning o‘rtamiyona klubi 22,5 mln yevro evaziga «Ayaks» himoyachisi Kelvin Beyssini safiga qo‘shib oldi. 23 yoshli futbolchi bilan to‘rt yillik shartnoma tuzilgan. Nigeriyalik futbolchi «Ayaks»da atigi bir mavsum o‘ynadi: amsterdamliklar uni 2022 yil yozida «Reyndjers»dan sotib olgandi. Endi Beyssi dunyoning eng kuchli ligasiga yo‘l oldi. Agar u «Fulhem»da o‘zini ko‘rsata olsa, unda yanada kattaroq jamoaga o‘tish imkoni paydo bo‘ladi.
«Milan» Samuel Chukvezeni sotib oldi
Bu transfer bo‘yicha muzokaralar anchadan buyon olib borilayotgandi, endi esa bu kelishuv haqida rasman e’lon qilindi. 24 yoshli reaktiv vinger «Vilyarreal»dan «Milan»ga o‘tib, 5 yillik shartnoma tuzdi va 21-raqamli futbolkani tanladi. OAVdagi xabarlarga ko‘ra, ushbu transfer italyan klubiga 25 mln yevroga tushgan.
Amalda hal bo‘lgan transferlar
Foto: EMILIO ANDREOLI/GETTY IMAGES
«Manchester Yunayted» Hoylundni sotib olmoqda
«Manchester Yunayted» ikkita katta transferga tayyorlanmoqda. Angliya klubi «Atalanta»dan 20 yoshli daniyalik hujumchi Rasmus Hoylundni sotib oladi. The Athletic ma’lumotiga ko‘ra, «MYu» bu futbolchi uchun 75 million yevro to‘laydi, yana 10 million yevro bonuslar ko‘rinishida o‘tkazib berilishi mumkin. Fabritsio Romano ma’lumotiga ko‘ra, futbolchi bilan besh yillik shartnoma imzolanadi.
«Yangi Holand» laqabini olgan forvard o‘tgan mavsum A seriyaning 32 o‘yinida 9 gol urishga erishgan. «Atalanta» futbolchi sotuvidan 90 million yevro ishlab olishni ko‘zlagandi, ammo yakunda «MYu»ning taklifiga rozilik bergan.
Mankunianliklar yana bir jiddiy transfer ustida ishlamoqda — «Fiorentina»dan 26 yoshli marokashlik tayanch yarimhimoyachisi Sofiyan Amrabat sotib olinadi. The Guardian ma’lumotiga ko‘ra, «MYu» keraksiz futbolchilardan kimnidir sota olsa, bu transfer amalga oshishi mumkin bo‘ladi. Amrabatning transfer qiymati 50 million yevro atrofida bo‘lishi mumkin.
«Liverpul»ni chempionlik tarkibidagi yana bir futbolchi tark etdi
Fabinoning Saudiya Arabistoniga transferi dostoni poyoniga yetmoqda. Insayder Fabritsio Romano «Here We Go» iborasi bilan ushbu braziliyalikning «Al-Ittihod»ga transferi hal bo‘lganini xabar qildi. 29 yoshli futbolchi allaqachon tibbiy ko‘rikdan o‘tib bo‘lgan.
Transfer qiymati – 40 mln yevrodan ortiq, futbolchi bilan uch yillik shartnoma tuziladi. Jurnalist Nikolo Shiraning ma’lumotiga ko‘ra, futbolchining yillik maoshi miqdori 25 mln yevroni tashkil etadi.
Fabino – Chempionlar ligasi va Angliya chempionatida g‘olib bo‘lgan «Liverpul» tarkibining muhim qismi edi. Ammo so‘nggi mavsumda ushbu tayanch yarimhimoyasi vakili o‘yinida pasayish ko‘zga tashlandi. Katta ehtimol bilan Yurgen Klopp shuning uchun ham uni ushlab qolishga harakat qilmadi. Bundan avvalroq jamoa sardori Jordan Henderson ham 33 yoshida «Liverpul»ni tark etib, Saudiya Arabistoniga, Stiven Jyerrard boshqaruvidagi «Al-Ittifoq» klubiga yo‘l olgandi.
Saudiya Arabistonida mini-Superliga yig‘ilmoqdami?
Yana bir top-futbolchi tez orada Saudiya ligasida paydo bo‘ladi! Romanoning xabar qilishicha, «Bavariya» va «An-Nasr» Mane transferi bo‘yicha kelishuvga erishgan.
«Liverpul»dan ketganidan keyin senegallik hujumchi Germaniya chempionatiga moslasha olmadi. «Bavariya» uni sotish uchun variantlar qidirayotgandi va Saudiya Arabistonidan barchani qoniqtiradigan taklif bo‘ldi. Transferni e’lon qilish uchun futbolchi tibbiy ko‘rikdan o‘tishi va klublar hujjatlarning bir qismini kelishi olishi masalasi qolgan.
Romanoning ma’lumotiga ko‘ra, «An-Nasr» 31 yoshli vinger uchun myunxenliklarga 40 mln yevroga (30 mln yevro va bonuslar) yaqin mablag‘ to‘lab beradi. Sadio allaqachon bo‘lajak klubi bilan o‘zaro shartnomani kelishib olgan, unga ko‘ra yiliga 40 mln yevro oladi. Ronaldu to‘p surayotgan ushbu klubga bungacha Fofana, Brozovich va Telles qo‘shilgandi.
«Milan» Tonali transferidan tushgan pullarni sarflamoqda
Foto: GETTY IMAGES FOR USSF
«Rossonerilar» yozgi kampaniyani davom ettirmoqda. Sandro Tonali ketganidan keyin klubga bir necha futbolchi olib kelindi: Ruben Loftus-Chik, Kristian Pulishich (ikkisi ham – «Chelsi»), Samuel Chukveze («Vilyarreal»), Noa Okafor («RB Zalsburg») va Teyani Reynders (AZ). Navbatdagi transfer – «Valensiya» yarimhimoyachisi Yunus Musa bo‘ladi.
Fabritsio Romanoga ko‘ra, «Milan» ushbu amerikalik futbolchi bilan ham, ispan klubi bilan kelishuvga erishgan. Unga ko‘ra, transfer uchun «Valensiya»ga 20 mln yevro to‘lab beradi. Futbolchi tibbiy ko‘rikdan o‘tmoqda.
«Chelsi» yana bir iste’dodli futbolchini transfer qilmoqda
Foto: JEAN CATUFFE/GETTY IMAGES
Londonliklar o‘z transfer mashinasini to‘xtatmayapti. «Chelsi» «Renn»dan 19 yoshli yarimhimoyachi Lesli Ugochukvuni transfer qilishni istamoqda, deb xabar beradi Fabritsio Romano. Londonliklar ushbu futbolchi uchun 30 mln yevro to‘lashga tayyor. «Chelsi» Ugochukvu bilan o‘zaro shartnomani kelishib bo‘lgan. Tez orada futbolchi tibbiy ko‘rikdan o‘tishi kutilmoqda. 2022/2023 yillar mavsumida Lesli «Renn» safida fransuz chempionatida 26 o‘yinda maydonga tushib, bir gol urgan va bir golli uzatma bergan. Uni jamoada qoldirish yoki ijaraga berish masalasini Pochettino yig‘inlardan keyin hal qiladi.
Transferlar bozorida yana qanday xabarlar?
Usmon Dembele. Foto: DEFODI IMAGES VIA GETTY IMAGES
Dembele «PSJ»ga o‘tishi mumkin
Ispaniyaning AS nashri «Barselona»ning 26 yoshli fransuz vingeri Usmon Dembele «PSJ» qiziqishlari doirasida ekanini xabar qildi. Agar hujumchi Kilian Mbappe ketsa, Dembele Parij klubining birinchi maqsadi bo‘ladi.
Manbaning qayd etishicha, 1 avgustdan Dembelening shartnomasidagi badal puli miqdori 100 million yevroga yetadi, shu sanagacha esa bu raqam 50 million yevro bo‘lib turadi. Fransuz futbolchisining «Barsa» bilan shartnomasi 2024 yil yoziga qadar tuzilgan.
RMC Sport jurnalisti Fabris Hokinsning qo‘shimcha qilishicha, Dembele transferi bo‘yicha muzokaralar faol kechmoqda. «PSJ» 50 million yevrolik punktni ishga tushirib, narx ikki barobar oshishidan oldinroq transferni hal qilishga urinmoqda.
Ispaniyaning COPE nashri esa futbolchida hozircha «PSJ» bilan hech qanday kelishuv yo‘qligini xabar qilgan. Shuningdek, kataloniyaliklar klubiga ham hozircha rasmiy taklif kelib tushmagan, futbolchini ham «Barselona»da barchasi qoniqtirmoqda.
Klubdagilar hisoblashicha, «PSJ»ning qiziqishi haqidagi xabarlar — futbolchining agentining hiylasi bo‘lib, u shu orqali «Barselona» rahbariyatini yangi shartnomaga ko‘ndirmoqchi.
«Real» Mbappeni bu yozda sotib olmaydi
As jurnalisti Xoakin Maroto «Real» Kilian Mbappeni faqat 2024 yilda, erkin agent maqomida safga qo‘shib olishi mumkinligi, bu yozda esa uning tovon pulini to‘lamoqchi emasligini xabar qildi.
Madrid klubi yozgi transferlar oynasida «PSJ» bilan ushbu forvard bo‘yicha muzokara o‘tkazmayapti — va muzokara boshlashni rejalashtirmagan ham. Bundan tashqari, «Real»dagilar agar uni shu yozda xarid qilmoqchi bo‘lsa, 24 yoshli fransuz transferi qanchaga tushishini ham baholamagan.
Avvalroq Marca nashri «Real» 2022 yilda madridliklarning Mbappe transferi bo‘yicha uchta rasmiy so‘rovini e’tiborsiz qoldirgan «PSJ» prezidenti Nosir Al-Hilayfiy bilan ham to‘g‘ridan to‘g‘ri muzokara o‘tkazishni istamayapti.
Kilianning o‘zi esa, nashrning qayd etishicha, «Real»ning ishonchini poymol qilganini tushunib turibdi va o‘tgan yilgi qaroridan afsusda.
Yana Saudiya chempionati
Saudiya Arabistoni Yevropa klublarini o‘ziga jalb etishda davom etadi.
«PSJ» sardori Markinos ham «An-Nasr» tomonidan transfer qilinishi mumkin. Jurnalist Rudi Galettining yozishicha, 29 yoshli braziliyalikning o‘zi ushbu ligaga o‘tishga rozi. Qayd etilishicha, saudiyaliklar klubi «PSJ»ga rasmiy taklif yuborgan, shuningdek Markinos bilan o‘zaro shartnoma detallari muhokama qilinmoqda.
Jurnalist Nikolo Shira esa «PSJ» yarimhimoyachisi Marko Verratti «Al-Hilol» bilan uch yillik shartnoma bo‘yicha kelishib olganini xabar qilmoqda. Saudiyaliklar klubi «PSJ»ga 30 yoshli futbolchi uchun 50 mln yevro to‘lashga tayyor (30 mln yevrolik birinchi taklif rad etilgan). «Al-Hilol» hozirgacha Kalidu Kulibali, Malkom, Sergey Milinkovich-Savich va Ruben Neveshni o‘z safiga qo‘shib olgandi. Jamoani esa Jorjye Jyezush boshqaradi.
AS xabariga ko‘ra, «Al-Hilol» «Sevilya» hujumchisi Yusuf An-Nosiriy transferi uchun ham 45 mln yevro taklif qilgan. Saudiya klubi 26 yoshli futbolchiga 15 mln yevro miqdorida yillik maosh tayinlashga tayyor. Marokashlik forvard 2020 yildan buyon «Sevilya» safida to‘p surmoqda. U o‘tgan mavsumda ispan klubi safida 48 o‘yinda maydonga tushib, 18 gol urgan va ikki golga uzatma bergan. Transfermarkt uning transferini 20 mln yevroga baholagan.
