Ronaldu jamoasida yangi superyulduz va Buffonning futboldan ketishi. So‘nggi transfer xabarlari

Ramos Turkiyada

37 yoshli Serxio Ramosning Yevropadagi futbolchilik faoliyati poyoniga yetib bormoqda. «Real»dagi 16 yil va  «PSJ»dagi ikki yildan keyin ispaniyalik himoyachi Turkiya chempionatiga yo‘l oldi. Haber Global, ma’lumotiga ko‘ra, u «Galatasaroy» bilan kelishuvga erishgan — Ramos bu klubga erkin agent maqomida qo‘shiladi. Transfermarkt portalida ushbu faxriy futbolchining transfer bahosini 4,5 million yevro qilib ko‘rsatilgan.

«Liverpul»ning Romeo Lavia bo‘yicha yangi taklifi rad etildi

Bu transfer qachondir amalga oshadi. Ben Jyeykobs ma’lumotiga ko‘ra, «Liverpul» «Sauthempton»ga 48 mln yevro miqdorida taklif yuborgan, ammo bu taklif ham qaytarilgan. APLni tark etgan klub 19 yoshli yarimhimoyachisi uchun kamida 58 mln yevro so‘ramoqda, ammo qayd etishlaricha, muzokaralardagi vaziyat o‘zgarib bormoqda. Lavia Yurgen Klopp jamoasiga o‘tishni qattiq xohlamoqda, shuning uchun bu transfer shu yozda amalga oshishi ehtimoli yuqori.

Marko Verratti «Al-Hilol» bilan kelishuvga erishdi

«PSJ»ning 30 yoshli tayanch yarimhimoyachisi ham Saudiya Arabistoniga transfer bo‘lishi oydinlashmoqda. Fabritsio Romanoning yozishicha, futbolchi va klub o‘rtasida og‘zaki kelishuvga erishib bo‘lingan. Verratti yaqinda «Inter»ga qarshi kechgan o‘rtoqlik o‘yinida qatnashmagani ham buni bilvosita tasdiqlaydi.

Markoning ketishiga faqat «PSJ» to‘sqinlik qilishi mumkin. Fransiya chempionlari va «Al-Hilol» transfer bahosi bo‘yicha kelisha olmayapti. Parij klubi ko‘proq talab qilmoqda, saudiyaliklar esa narxni 30 mln yevrodan oshirmayapti.

«PSJ» hujum chizig‘i uchun ikki variantni ko‘zlagan

Qayerda transfer bo‘lsa, u yerda «PSJ» ham bor. RMC Sport ma’lumotiga ko‘ra, Parijdagilar Harri Keyn transferi amalga oshishiga ishonmayapti va shuning uchun boshqa hujumchilarga e’tibor qaratilgan. Birinchisi — 24 yoshli fransuz Randal Kolo Muani, «Ayntraxt» uning uchun 70 mln yevro va bonuslar so‘ramoqda. Ikkinchisi — «Benfika»ning 22 yoshli hujumchisi Gonsalu Ramush. Portugaliyalik hujumchi uchun yanada ko‘proq so‘rashmoqda — bonuslardan tashqari 80 mln yevro.

Ziyoshga Saudiyaning ikki klubi qiziqmoqda

Saudiya Arabistoni bu yozda yangiliklar lentasini to‘ldirmoqda — mahalliy gigantlar Hakim Ziyoshni safiga qo‘shib olishni istamoqda.

Ben Jyeykobsning yozishicha, anchadan buyon «Chelsi»ni tark etishni istayotgan 30 yoshli marokashlik yarimhimoyachiga «Ash-Shabob» va «Al-Ahli»dan taklif bor. Avvalroq «An-Nasr» klubi ham ushbu futbolchiga qiziqish bildirgandi, ammo bu klub bilan kelishuvga erishib bo‘lmagan. O‘z navbatida, futbolchining o‘zi maoshi kamaysa ham, «Ayaks»ga qaytishni istamoqda, shu tufayli arab klublarida imkoniyat kamroq.

Buffon faoliyatini yakunladi

Fabritsio Romanoning xabariga ko‘ra, bu safar futbolchining qarori qat’iy. 45 yoshli afsonaviy darvozabon katta futbolni butunlay tark etayotgani haqida yaqin kunlar ichida e’lon qilishi kutilmoqda. Jahon chempioni, Italiyada «Yuventus» bilan ko‘p bor chempion bo‘lgan, «PSJ» safida Fransiya chempioniga aylangan — ajoyib karera! Jiji faoliyati so‘nggida yana qadrdon «Parma»si uchun o‘ynab berib, endi qo‘lqoplarini mixga ilmoqda.