Toshkentda katta miqdordagi jinoiy daromadlarni legallashtirgan shaxslar aniqlandi

Toshkent shahrida avtomashina yetkazib berish bo‘yicha lizing shartnomasi tuzib, mijozlarning katta miqdordagi mablag‘ini o‘zlashtirgan shaxslar aniqlandi.

Bosh prokuratura huzuridagi Departament xabariga ko‘ra, 2022 yilda tashkil etilgan korxona xodimlari 188 nafar fuqaroga muddatli to‘lov asosida avtomashina yetkazib berish bo‘yicha lizing shartnomasi asosida jami 9,8 mlrd so‘mini dastlabki to‘lov sifatida qabul qilib, shundan 138 nafar fuqaroga avtomashina olib bermasdan, mijozlarning 946,2 mln so‘mini plastik kartalariga o‘tkazib, naqdlashtirib olgan.

Shuningdek, boshqa bir korxona xodimlari 98 nafar fuqaro bilan muddatli to‘lov asosida avtomashina yetkazib berish bo‘yicha tuzilgan lizing shartnomasi bo‘yicha 4,7 mlrd so‘mni dastlabki to‘lov sifatida qabul qilib, shundan 1,5 mlrd so‘mni o‘z plastik kartalariga o‘tkazib, naqdlashtirib olgan. Bundan tashqari, 462 mln so‘mni yana bir korxonaning nizom jamg‘armasini shakllantirish uchun o‘tkazib, jinoiy yo‘l bilan topilgan daromadlarini legallashtirgan.

Mazkur holatlar yuzasidan Jinoyat kodeksining 188-1-moddasi (pul mablag‘larini va (yoki) boshqa mol-mulkni jalb etishga doir noqonuniy faoliyat) va 243-moddasi (jinoiy faoliyatdan olingan daromadlarni legallashtirish) bilan jinoyat ishlari qo‘zg‘atilib, tergov harakatlari o‘tkazilmoqda.