Halim Safarov Buxoro tumani hokimi vazifasini bajaruvchi etib tayinlandi. Tumanning oldingi hokimi Xayrullo Jo‘rayev prezident tanqididan so‘ng ishdan olingandi.
Xalq deputatlari Buxoro tumani kengashining navbatdan tashqari sessiyasi bo‘lib o‘tdi. Sessiyada viloyat hokimi Botir Zaripov nutq so‘zladi.
«Buxoro shahrining atrofida joylashgan, qulay infratuzilmaga ega tumanda mavjud barcha imkoniyatlardan samarali foydalanilmayapti, desak xato bo‘lmaydi. Ayniqsa, hududda investitsiyalarni jalb etish borasidagi ishlar qoniqarsiz bo‘lib, bu holat prezidentimiz raisligida o‘tgan videoselektor yig‘ilishida qattiq tanqid qilindi hamda tuman hokimi Xayrullo Jo‘rayev egallab turgan lavozimidan ozod qilindi», dedi Botir Zaripov.
Shundan so‘ng viloyat hokimi Xayrullo Jo‘rayevni Buxoro tumani hokimi lavozimidan ozod etish to‘g‘risidagi qarorni o‘qib eshittirdi. Ushbu masala ovozga qo‘yilib, deputatlar tomonidan ma’qullandi.
«Buxoro Agro Eksport tashqi savdo» mas’uliyati cheklangan jamiyatiga rahbarlik qilib kelayotgan Halim Safarov nomzodi Buxoro tumani hokimi vazifasini bajaruvchi etib tayinlash to‘g‘risida viloyat hokimining qarori qabul qilingani deputatlarga ma’lum qilindi.
Halim Safarov 1973 yil 2 mayda Buxoro shahrida tug‘ilgan. 1995 yilda Buxoro davlat universiteti, 2008 yilda Buxoro oziq-ovqat va yengil sanoat texnologiyasi instituti, 2023 yilda Qozon federal universiteti (magistratura)ni tugatgan.
Halim Safarov neft-gaz sohasida va tadbirkorlik tizimida faoliyat ko‘rsatgan. Oxirgi yillarda «Yevrosnar» mas’uliyati cheklangan jamiyati bosh direktori lavozimida ishlagan. Hozirga qadar «Buxoro Agro Eksport tashqi savdo» mas’uliyati cheklangan jamiyatiga rahbarlik qilib kelayotgan edi.
- Muqaddam «G‘ijduvon» EIZ rahbari Xayrullo Jo‘rayev 2020 yil dekabrida Buxoro tumani hokimi etib tasdiqlangandi. 2023 yil iyulida prezident raisligidagi yig‘ilishda o‘ndan ortiq tuman va shahar hokimlari qatorida uni ham ishdan olishga ko‘rsatma berilgandi.
