«PSJ» va «Bavariya»da superxaridlar. So‘nggi transfer xabarlari
|20:48 / 12.08.202330 34211 min
«Real» Kurtuaga o‘rinbosar izlamoqda, «Chelsi» va «Liverpul» bir futbolchini talashmoqda.
Yangi kun — yangi transfer xabarlari. Bugun ham bir necha klublar navbatdagi xaridlarini e’lon qildi, xususan, Harri Keynning uzoq kutilgan o‘tishi amalga oshdi, Dembele Fransiyaga qaytdi va «Manchester Siti» kutilmagan yurishga tayyorlanmoqda.
Keyn baribir «Bavariya»ga o‘tdi
Yozning asosiy transfer ertagi yaxshilik bilan yakuniga yetdi. Biz har kuni bir-birini rad etuvchi turli xabarlar o‘qidik — goh Harri Keyn «Bavariya»ga ketishi hal bo‘lgani aytilsa, goh u «Tottenhem»da qolishga qaror qilgani haqida gaplar chiqdi. Ammo endi bu masalaga uzil-kesil nuqta qo‘yildi. Juma kuni insayder Fabritsio Romano klublar kelishib olgani va endi angliyalik futbolchi tibbiy ko‘rikdan o‘tish uchun Myunxenga uchayotgani haqida xabar berdi. Bir necha soat o‘tib to‘purar hujumchi chindan ham Germaniya shahriga uchib keldi.
Bugun esa myunxenliklar transferni rasman e’lon qildi. Futbolchi uchun «Tottenhem»ga 100 million yevro to‘lanadi va yana 20 million bonus sifatida ko‘zda tutilgan, uning o‘zi bilan to‘rt yillik shartnoma imzolandi.
«Bavariya» bu orqali Robert Levandovski ketganidan keyin markaziy hujumchi pozitsiyasida yuzaga kelgan muammoga barham berdi. Bu pozitsiyani aslida vinger bo‘lgan Erik Shupo-Moting bilan yopib turishgandi.
«Tottenhem» esa keyingi yil yozida tekinga ketishi mumkin bo‘lgan futbolchi uchun katta pul ishlab oldi. Qolaversa, jamoa bu bilan ichki chempionatdagi raqiblari safini kuchaytirmadi, futbolchiga ko‘p vaqtlardan buyon «MYu» va «Siti» qiziqib kelayotgan, ammo Levi hujumchini ularga sotmagandi.
30 yoshli futbolchining o‘zi esa nihoyat faoliyatida o‘zgarish qildi (ikki-uch yildan buyon u sovrinlar uchun kurashuvchi jamoaga o‘tishi kerakligi haqida aytib kelishardi, unga «Real»dan ham qiziqish mavjud edi). Qanchalik ajablanarli bo‘lmasin, u shu yoshga chiqib birorta sovrin qo‘lga kiritmagan. Endi esa u bugunning o‘zida «RB Leypsig»ga qarshi kechadigan Germaniya Superkubogi o‘yinida maydonga tushishi mumkinligi ham istisno etilmayapti.
Usmon Dembele – «PSJ» futbolchisi
«Barselona» hujumchisi Usmon Dembele «PSJ»ga o‘tdi, parijliklar klubi matbuot xizmati uni jamoaning yangi futbolchisi sifatida rasman tanishtirdi.
26 yoshli fransuz bilan shartnoma 5 yilga — 2028 yil iyuniga qadar mo‘ljallangan. Parijliklar safida ushbu forvard 23-raqamli futbolkada to‘p suradi. Transfer 50 million yevro evaziga amalga oshgan. Bu Dembelening shartnomasida ko‘rsatilgan badal puli hisoblanadi. Kelishuv shartlariga binoan, mablag‘ning teng yarmi futbolchining hisob raqamiga o‘tkazilishi belgilangan.
Mavzuga oid
«Barselona» Dembeleni 2017 yil yozida, «PSJ»ga o‘tib ketgan Neymar o‘rniga shoshilinch ravishda «Borussiya»dan 130 million yevroga sotib olgandi. U kataloniyaliklar safida 3 marta Ispaniya chempioni bo‘ldi (2017/18, 2018/19, 2022/23), Ispaniya Kubogi (2017/18, 2020/21) va mamlakat Superkubogini qo‘lga kiritdi (2018, 2022/23).
O‘tgan mavsumda Dembele «Barselona» uchun barcha turnirlar doirasida 35 ta o‘yinda maydonga tushib, 8 gol urdi va 9 golga uzatma berdi.
«Chelsi» va «Liverpul» Kaysedo uchun kurashmoqda
Shunday hissiyot paydo bo‘lganki, Moyses Kaysedo atrofidagi vaziyat har soatda o‘zgarmoqda. U goh «Chelsi»ga o‘tgan bo‘ladi, goh «Liverpul» uchun tibbiy ko‘rikdan o‘tadi, goh yana barchasi o‘zgarib ketadi.
«Liverpul» yoki «Chelsi» yaqin kunlar ichida APL tarixidagi eng qimmatbaho transferni amalga oshirishi kerak — «Brayton» ekvadorlik havbek Moyses Kaysedo uchun 127,6 million yevrodan ortiq mablag‘ olishni istamoqda.
Biroz avvalroq «Brayton» «Chelsi»ning 100 mln funtlik taklifini rad etgan, mersisaydliklar esa undan ko‘proq, 110 mln funtlik taklif berib, masalani hal qilgandek edi.
The Athletic ma’lumotiga ko‘ra, juma kuni futbolchi «Liverpul»ga transfer oldidan tibbiy ko‘rikdan o‘tgandi. Hatto Yurgen Klopp ushbu 21 yoshli futbolchi transferini tasdiqlagandi.
«Menga aytishdiki, tasdiqlashim mumkin: klub Kaysedo bo‘yicha kelishuvga erishgan. Hali futbolchining o‘zi bilan ko‘rishishimiz kerak», — degandi mutaxassis. Ammo u shoshilgan bo‘lib chiqdi.
Kunning ikkinchi yarmida insayder Fabritsio Romano hali barchasi hal bo‘lmagani va «Chelsi» «Liverpul»nikidan yaxshiroq taklif berishga tayyorligini aytdi. Uning ma’lumotiga ko‘ra, Kaysedoning o‘zi ham London klubiga o‘tishni istaydi - u may oyida londonliklar jamoasi vakillariga so‘z bergan va shu so‘zida turishni istamoqda.
Juma kuni kechqurun Romano «Liverpul» Kaysedo uchun kurashdan chiqishi mumkinligini xabar qildi. «Chelsi» esa aksincha «Brayton» bilan muzokaralarni faol olib bormoqda. Shuningdek, Kaysedo londonliklar klubining ijtimoiy tarmoqlardagi sahifalariga obuna bo‘lgan.
«Real» Kurtuaga o‘rinbosar qidirmoqda
Madridning «Real» klubi asosiy darvozaboni Tibo Kurtua mavsum oxiriga qadar safdan chiqqani tufayli darvozabon qidirmoqda. AS ma’lumotiga ko‘ra, Qirollik klubiga o‘tish uchun asosiy nomzod — «Sevilya» posboni Yassin Bunu bo‘lib turibdi.
32 yoshli marokashlik uchun «Real» 20-25 million yevro to‘lashga tayyor. Ispaniyaning Marca nashri qayd etishicha, futbolchining 2025 yil yoziga qadar tuzilgan shartnomasida 50 million yevro miqdorida badal puli ko‘rsatilgan.
Shuningdek, «Real»dagilar ispaniyalik David De Xea nomzodini ko‘rib chiqayotgani haqida ham xabarlar bor, ammo jamoa bosh murabbiyi Karlo Anchelotti va uning murabbiylar shtabi a’zolari klub direktorlari kengashiga Bunu — nisbatan ustuvor variant ekanini aytishgan.
Insayder Florian Plettenberg esa «Chelsi» darvozaboni Kepa Arrisabalaga «Real»ga o‘tishga yaqin ekanini xabar qilmoqda.
«Man Siti» Paketa uchun 101 mln yevro taklif qildi, «Vest Hem» ko‘proq so‘ramoqda
Aftidan, Lukas Paketa «Manchester Siti»ga juda kerak. Angliya chempionlari «Vest Hem»ga dastlab 80 mln yevro taklif qilgandi, londonliklar klubi rad javobini bergandi. «Man Siti» chekinmadi va taklif miqdorini oshirdi.
Jurnalist Muhammad Buhafsi xabariga ko‘ra, 25 yoshli braziliyalik «Manchester Siti» bilan olti yillik shartnoma bo‘yicha kelishib qo‘ygan.
«Shaharliklar» «Vest Hem»ga 98 million yevro, shuningdek bonuslar ko‘rinishida to‘lanadigan 11,6 million yevro taklif qilgan. Ammo «Brayton»dan o‘rnak olgan londonliklar 127 million yevro talab qilmoqda.
Klublar o‘rtasida muzokaralar davom etmoqda. Qayd etilishicha, «Siti» vaziyatga optimistik ruh bilan qaramoqda va maqsadiga erishishiga shubha qilmayapti.
Paketa o‘tgan mavsumda barcha turnirlar doirasida 41 o‘yinda maydonga tushib, besh gol urgan va yetti golga uzatma bergan.
«Manchester Yunayted» Fred ketganini e’lon qildi
30 yoshli Fred «Old Trafford»ni tark etdi. Bu haqda so‘nggi hafta davomida aniq bo‘lib ulgurgandi, ammo endi tomonlar transfer bo‘yicha uzil-kesil kelishuvga erishdi. Braziliyalik futbolchi tibbiy ko‘rikdan o‘tdi va shartnomaga imzo chekdi.
«Fenerbahche» klubi transfer uchun 10 mln yevro to‘lagan, yana 5 mln yevro miqdorida bonus va’da qilingan. Yarimhimoyachi mankunianliklar safida 2018 yildan buyon to‘p surib kelayotgandi. U klub bilan Angliya ligalari kubogini qo‘lga kiritdi va Yevropa Ligasi finaliga chiqdi.
«Aston Villa» Dzanolo bo‘yicha taklif berdi
«Aston Villa» «Galatasaroy»ga Nikolo Dzanolo transferi bo‘yicha rasmiy taklif yuborgan: bir yilga 3 mln yevro to‘lab ijaraga olish va mavsum yakunida 20 mln yevroga transfer qilish. Bundan tashqari, ingliz klubi futbolchining ijara vaqtidagi maoshini to‘liq to‘lashga tayyor. Qolaversa, yana 7 mln yevro bonuslar ko‘rinishida o‘tkazib berilishi mumkin. Hozircha «Galatasaroy» bu taklifni o‘rganmoqda va javob qaytarishga shoshilmayapti.
«Chelsi» Adams transferidan bosh tortdi
Tayler Adams ma’lum vaqtga o‘zini «Chelsi» futbolkasida tasavvur qilib turgandi. London klubi uning shartnomasidagi 24 mln yevrolik to‘lov bo‘yicha bandni faollashtirgan, amerikalikning o‘zi tibbiy ko‘rikdan ham o‘tgandi. Barchasi hal bo‘lgandek ko‘rinayotgandi. Ammo «Chelsi» yana Kaysedo transferi ustida ishni tikladi, Adams esa o‘tgan mavsum oxirida chempionshipga tushib ketgan «Lids»ga qaytishiga to‘g‘ri keldi. Futbolchi barcha tibbiy sinovlardan o‘tgan bo‘lsa ham, «Chelsi» u bilan shartnoma imzolamadi.
