Prezident «xorijliklar oldida uyalib qolayotgan» tadbirkorning muammosiga yechim berdi

Prezident Shavkat Mirziyoyev tadbirkorlar bilan ochiq muloqot davomida ularni qiynayotgan muammolarni tingladi.

«Green White Solutions» korxonasi rahbari Abduqahhor Toshmuhamedov uchrashuvda videoaloqa orqali bog‘lanib, «qizil», «sariq» va «yashil» yo‘lakchalar bekor qilinayotganidan xursandligini bildirdi.

«Korxonamiz 2012 yil yanvar oyidan beri IT mahsulotlarini yaratib, O‘zbekiston va boshqa 9 ta xorijiy davlatga sotib keladi. Bugungi kunda tashkilotimizda 87 ta mutaxassis faoliyat olib boradi. Meni xursand qiladigan jihat, «qizil», «sariq» va «yashil» yo‘lakchalar bekor qilinayotgani bo‘ldi. Mijozlarimiz savdo kompaniyalari bo‘lgani sababli har doim «qizil» yo‘lakka tushib qolaverardik. Bu bizni xafa qilardi», dedi u.

Davlat rahbari bugungi kunda IT sohasida hal qilinishi kerak bo‘lgan qanday muammolar borligini so‘radi. Tadbirkorning ta’kidlashicha, amaldagi ichki qonunchilik normalari xalqaro tashkilotlar bilan ishlashda qiyinchilik tug‘dirmoqda.

«Hozirda G‘arb mamlakatlariga o‘z mahsulotlarimizni eksport qilayotganda ular bizdan shartnomalarni rasmiylashtirishda nega xalqaro platformalardan foydalanmasligimizni so‘rashadi. Qonunchilikni o‘rganib chiqqanimizda, bu borada huquqiy asoslar yetarli emasligiga guvoh bo‘ldik.

Xalqaro platformada rasmiylashtirilgan shartnomalarni ro‘yxatdan o‘tkazayotganimizda tijorat banklari va soliq organlarida qiyinchilikka duch kelyapmiz. Agar shu bo‘yicha ham yechim berilsa, o‘ylaymanki, ishimiz ancha osonlashardi.

Har oy mijozlardan oladigan pulni o‘zimizning ichki platformaga qayta ro‘yxatdan o‘tkazishga ko‘p vaqtimiz ketyapti. Bugungi kunda 700 ga yaqin xorijiy hamkorlarimiz bor, ularning har biri bilan ichki tizimda alohida ishlashga to‘g‘ri keladi. Bu noqulayliklarni keltirib chiqarmoqda», degan Toshmuhamedov.

Prezident qiymati 100 ming dollargacha bo‘lgan xalqaro shartnomalarni amalga oshirish bo‘yicha xalqaro platformadan foydalanishni ko‘zda tutuvchi qonun yaratish kerakligini aytdi.

«Tadbirkorlarimizning hamkorlari O‘zbekiston ushbu sohada rivojlandi, nimaga qonunchilik o‘zgarmayapti, demoqda. Bu savol ham bizning kun tartibimizga qachondir chiqishi ayon edi, shu bilan bizning qonunlarimiz ham o‘zgaradi va sizlarga sharoit yaratib beramiz», dedi Shavkat Mirziyoyev.