Uzun tumanining Bobotog‘ hududidan bir institutning bir yo‘nalishida maqsadli kvotaga da’vogarlik qilgan ikki abituriyentdan yuqori ball olgani “yiqilib”, undan qariyb 35 ball kam olgani talabalikka tavsiya etildi.
2023/2024 o‘quv yilida Denov tadbirkorlik va pedagogika institutining xorijiy til va adabiyoti (ingliz tili) yo‘nalishiga Uzun tumani uchun 6 ta (shundan 2 tasi tumanning Bobotog‘ hududiga imtiyoz sifatida) maqsadli kvota ajratilgan.
Jami 6 ta maqsadli kvota uchun 60 nafar abituriyent raqobatlashgan. Jumladan, tumanning Bobotog‘ hududidagi Oqmachit mahallasida yashovchi Gulbanoz Tog‘ayeva 68,4 ball to‘plagan holda talabalikka qabul qilingan.
Ammo negadir Bobotog‘ hududidagi Tolto‘g‘ay mahallasida yashovchi abituriyent Nazirxol Normo‘minova ayni shu oliygohning bir xil yo‘nalishida maqsadli kvotaga da’vogar bo‘lgan holda 102,3 ball to‘plab, talaba bo‘lolmagan.
Balki Nazirxol Normo‘minovaning doimiy yashash mahallasi tumanning Bobotog‘ hududiga kirmas, degan o‘yda buni ham tekshirib ko‘rdik. Biroq bunday bo‘lib chiqmadi: u bilan bir mahallada yashovchi, bir maktabning bitiruvchisi bo‘lgan Mirjalol Ibragimov Termiz davlat pedagogika institutining tarix yo‘nalishiga aynan Bobotog‘ hududi uchun ajratilgan maqsadli kvota asosida talaba bo‘lgan.
Kun.uz oldinroq Navoiy viloyatining G‘ozg‘on shahri uchun Samarqand davlat tibbiyot universiteti hamda Buxoro davlat tibbiyot institutida 6 ta maqsadli kvota ajratilgani, ammo ularning ikkitasini shaharda bir oy ham yashamagan, boshqa hududdan kelgan abituriyentlar “ilib ketgani” haqida ham surishtiruv e’lon qilgandi
