“Biznesni unda omadi chopganlardan o‘rganing”. Hududlarda yirik biznes egalari yosh tadbirkorlarga master-klasslar o‘tishmoqda

Shavkat Mirziyoyev 18 avgust kuni tadbirkorlar bilan o‘tkazgan ochiq muloqotida biznes vakillari doim qo‘llab-quvvatlanishini ta’kidlab, ular uchun ko‘plab yengilliklarni e’lon qildi. Shuningdek, uchrashuvda muvaffaqiyatli biznes yuritayotgan ko‘plab tadbirkorlarni davlat mukofotlari bilan taqdirladi. Taqdirlanganlar orasida jizzaxlik Akmal Ahmedov ham bor. Davlat rahbarining farmoni bilan “Shuhrat” medali sohibi bo‘lgan Akmal Ahmedov Sharof Rashidov tumanidagi «Euro Aziya Motors» MChJga rahbarlik qiladi.   

Prezident bilan uchrashuvdan so‘ng hududlardagi yirik biznes vakillari qatori Akmal Ahmedov ham tadbirkorlikka endi kirib kelayotgan yoshlarga yo‘l-yo‘riq ko‘rsatish maqsadida master-klass o‘tkazdi. Shuningdek uchrashuvda prezident tomonidan biznes vakillariga yaratib berilgan yengilliklar, mahsulot ishlab chiqarishdan to unga bozor topishgacha bo‘lgan yo‘lda e’tibor qaratilishi lozim bo‘lgan jihatlar haqida batafsil tushunchalar berdi.

Unda yosh tadbirkorlar va tadbirkorlikni boshlash niyatida yurgan yigit-qizlar ishtirok etib, biznes yuritish sir asrorlari, muammoli vaziyatlarda to‘g‘ri qaror qabul qila olish kabi masalalarda tajriba almashdilar.

Akmal Ahmedov Sharof Rashidov tumanidagi «Euro Aziya Motors» MChJga rahbarlik qilishi bilan birga, Qatortol mahallasida hokim yordamchisi lavozimida ham faoliyat ko‘rsatadi.

U o‘z mablag‘i hisobidan 5,2 mlrd so‘mlik avtomobillarni sotish va texnik xizmat ko‘rsatish shoxobchasini barpo etib, 18 nafar yoshning bandligini ta’minladi.

Akmal Ahmedov jahon andozalariga to‘la javob beradigan 3 ming o‘rinli, 65 ish o‘rniga ega, sportning Velo VMX yo‘nalishi bo‘yicha velotrek majmuasi qurilishida bosh-qosh bo‘lgan. Velotrek majmuasida 4 ta xard qoplamli katta tennis kortlari, 4 ta zamonaviy sun’iy qoplamali futbol maydoni, 100 o‘rinli mehmonxona hamda 26 ta zamonaviy kemping dam olish uyi mavjud.

Bundan tashqari, Akmal Ahmedov Sharof Rashidov tumani hududidan 4 gektar yerda issiqxona tashkil qilib, shu yilning o‘zida ichki bozorga qariyb 1 mlrd so‘mlik pomidor, bodring va baqlajon mahsulotlari yetkazib bergan. 

Tadbirkor hokim yordamchisi sifatida o‘zi mas’ul bo‘lgan Qatortol mahallasidagi 10 ta xonadonda 1-1,5 sotixdan jami 12 sotix issiqxona, 5 ta xonadonda baliqchilik, 52 ta xonadonda parrandachilik yo‘lga qo‘yilishiga erishgan.