OTB O‘zbekistonga inson kapitalini rivojlantirish uchun pul ajratadi

Kambag‘allikni qisqartirish va bandlik vaziri Behzod Musayev Osiyo taraqqiyot banki (OTB)ning Inson resurslarini rivojlantirish sektori rahbari Ayako Inagaki boshchiligidagi delegatsiya a’zolari bilan uchrashuv o‘tkazdi.

Uchrashuvda mamlakatda inson kapitalini rivojlantirish sohasida ikki tomonlama hamkorlikni mustahkamlash, yangi tashabbuslarni amalga oshirish borasida muzokaralar olib borilgan.

Shuningdek, “Zamonaviy iqtisodiyot uchun ko‘nikmalarni rivojlantirish” loyihasi bo‘yicha O‘zbekiston va Osiyo taraqqiyot banki o‘rtasida tuzilgan 93 mln dollar miqdoridagi bitim ijrosini amalga oshirish borasida fikr-mulohazalar bildirildi.

“Mazkur loyiha qurilish, to‘qimachilik va tikuvchilik sanoati, axborot-kommunikatsiya texnologiyalari, agrobiznes va oziq-ovqat sanoati, texnika va uskunalarga xizmat ko‘rsatish kabi tarmoqlarda malakali ishchi kuchi sifatida inson resurslarini rivojlantiradi”, deyiladi xabarda.

Avvalroq, Osiyo taraqqiyot banki O‘zbekistonga 125 mln dollar qarz berishi xabar qilingandi. Ushbu mablag‘lar yettita viloyat: Buxoro, Farg‘ona, Qashqadaryo, Samarqand, Surxondaryo, Navoiy va Toshkentdagi umumiy uzunligi 359 km bo‘lgan 12ta elektr uzatish liniyalarini qayta ta’minlash, shuningdek, Fayzobod, Obihayot, Zafar va Zarafshondagi 220 kilovoltli to‘rtta kichik stansiyani rekonstruksiya qilish uchun ishlatiladi.

Ma’lumot uchun, O‘zbekiston OTBga 1995 yilda a’zo bo‘lgan bo‘lib, o‘shandan beri bank mamlakatga 11 milliard dollar yaqin miqdorida qarz, grant va texnik ko‘mak ajratgan.