Germaniya Boltiqbo‘yi davlatlariga Rossiya tahdididan himoya haqida va’da berdi

Germaniyaning Boltiqbo‘yi mintaqasidagi NATO ittifoqchilari kerak bo‘lsa, ularga harbiy yordam ko‘rsatilishiga ishonchi komil bo‘lishi mumkin, dedi Germaniya mudofaa vaziri Boris Pistorius 27 sentabr, chorshanba kuni Tallinda bo‘lib o‘tgan xavfsizlik anjumanida. «Germaniya mas’uliyatni, yetakchi rolini o‘z zimmasiga oladi», - deya ta’kidladi u.

Germaniya Mudofaa vazirligi rahbari Berlinning Litvada Bundesver brigadasini joylashtirish niyatini tasdiqladi. Yil oxirigacha ishlab chiqilishi yakunlanadigan rejalarga ko‘ra, Germaniya 4000 nemis askarini va ularning oila a’zolarini Litvada doimiy ravishda joylashtiradi. «Biz ularni Litvada kerakli infratuzilma tayyor bo‘lishi bilanoq joylashtiramiz», dedi Pistorius.

Rossiyaning Ukrainaga qarshi urushini tanqid qilish

Boris Pistorius Ukrainani Rossiya agressiyasi fonida uzoq muddatli qo‘llab-quvvatlashga yana bir bor ishontirdi. «Biz qancha vaqt kerak bo‘lsa, shuncha sizning yoningizda bo‘lamiz», dedi u. Germaniya Mudofaa vazirligi rahbari Rossiyaning Ukrainaga qarshi urushdagi g‘alabasi dahshatli oqibatlari haqida ogohlantirdi.

«U xalqaro qoidalarni mensimaydi. U jinoiy va noinsoniy usullardan foydalanadi», - dedi Pistorius.

Estoniyada bo‘lib o‘tayotgan anjumanda Boltiqbo‘yi davlatlari, shuningdek, NATO boshqa mamlakatlari va Ukraina vakillari ishtirok etmoqda. Boris Pistorius Latviya va Estoniyaga uch kunlik tashrifi yakunida forumda so‘zga chiqdi.