“Germaniya uchun muqobillik” (AfD) Saksoniya-Alxalt parlamentida oʻrinlarning 44,5 foizini qoʻlga kiritdi. Hokimiyatdagi kansler Mersning Xristian-demokratlar ittifoqi partiyasi esa bor-yoʻgʻi 18,5 foiz oʻrin egalladi. “Germaniya uchun muqobillik” partiyasi, agar yana 2-3 deputatni oʻz tomoniga ogʻrida olsa yoki biron bir partiya bilan koalitsiya tuza olsa, mahalliy hokimiyatni toʻliq shakllantira oladi.
Germaniya – Yevropa Ittifoqidagi aholi soniga koʻra, iqtisodiy ulushiga koʻra, yalpi ichki mahsuloti va siyosiy vazniga koʻra eng yirik, eng muhim davlat. Yevropa Ittifoqining rivojlanish yoʻlini belgilashda aynan Germaniya va Fransiya katta rolga ega.
Endi, bir vaqtlar birinchi va ikkinchi jahon urushlariga sababchi boʻlgan, millatchilik va natsizmning oʻchogʻi boʻlgan Germaniyada, yana ashaddiy millatchilarning mahalliy hokimiyatga kelishi – katta shokka, koʻplab savollarga sabab boʻlmoqda.
Nima uchun Saksoniya-Anxelt viloyati ashaddiy millatchilarga ovoz berdi? Bu yerda uchta yoʻnalishdagi noroziliklarni kuzatish mumkin.
Birinchisi, ijtimoiy protest. Saksoniya-Anxelt viloyati sharqiy Germaniyada, sobiq GDR hududida joylashgan. Gʻarbiy Germaniya viloyatlariga qaraganda iqtisodiy rivojlanish nisbatan pastroq, zavod-fabrikalar kamroq, ishsizlik nisbatan yuqoriroq. Shunday boʻlsa-da, Germaniyaning eng kam rivojlangan viloyati ham Yevropa Ittifoqidagi boshqa davlatlarga qaraganda ancha rivojlangan boʻlishi aniq. Yaʼni bu viloyat aholisi “Germaniya uchun muqobillik” partiyasiga ovoz berishda, oʻzlarining ijtimoiy-iqtisodiy vaziyatini Germaniyadagi eng rivojlangan viloyatlar bilan taqqoslagani kuzatiladi.
Ikkinchisi, madaniy protest. Saksoniya-Anxelt viloyati aholisi soʻrovlarda migrantlarga, emigrantlarga qarshi ovoz berganini bildirishgan. Misol uchun, “Men "Germaniya uchun muqobillik" partiyasiga ovoz berdim, chunki kechalari koʻchaga chiqqani qoʻrqib boshlagandim, endi bu partiya Saksoniya koʻchalarida xavfsizlik oʻrnatishiga ishonaman” deganlar boʻlgan. Aslida, Germaniya viloyatlari ichida Saksoniya-Anxeltda migrantlar soni eng kam boʻlgan viloyat hisoblanar ekan – umumiy aholining 8 foiziga yetmas ekan. Shunday boʻlsa-da, bu viloyat aholisi ksenofobiya va madaniy protest sabab, ultra oʻng partiyaga ovoz berdi.
Uchinchisi, geosiyosiy protest. “Germaniya uchun muqobillik” partiyasining eng katta tashqi siyosiy gʻoyalaridan biri – Rossiya bilan yarashish, Rossiyadan arzon gaz va neft sotib olishni qayta yoʻlga qoʻyish.
