Gvineyalik to‘purar, «Barselona»dagi vunderkind va Bellinghem. Mavsum kashfiyotlari haqida

Klublar futboli boshlanganiga endigina ikki oy bo‘lsa-da, mavsum juda ko‘p yangi nomlarni, eski nomlardagi yangi xislatlarni kashf qilmoqda. Bu bilan esa, tabiiyki, futbol tomosha qilish yanada zavqli bo‘ladi. Xo‘sh, Messi va Ronaldu Yevropani tark etgan ilk mavsumda, hamma Holand – Mbappe qarama-qarshiligini rasman kutib olishi kerak bo‘lgan bugungi pallada Yevropada kimlar porlamoqda? Quyida mana shunday futbolchilardan bir nechasi bilan tanishamiz.

SeRU GIRASSI (Shtutgart)

Aprel oyida «Shtutgart» xavfli zonaga tushib ketgach, Bruno Labadiya iste’foga chiqarilib, o‘rniga Sebastiyan Hyoness jamoaning yangi bosh murabbiyi etib tayinlangandi. Jamoa keyingi 8 turda 3 g‘alaba va 4 durangga erishdi va o‘tish o‘yinida «Hamburg»ni yengib, Bundesligada qolishni uddaladi. Hozir esa «Shtutgart» ligani «yondiryapti», 7 turdan so‘ng «Bavariya», «Borussiya» kabi jamoalarni ortda qoldirib, 2-o‘rinni egallab turibdi. Bu natijalarning maydondagi qahramoni ham bor – Seru Girassi.

Gvineyalik 27 yoshli hujumchi shu paytgacha Fransiya chempionatini aylanib chiqqan, «Kyoln»da ham ijara asosida to‘p surgan, o‘tgan yili «Shtutgart» safida ham gol urib yurgan, ammo bu safargisi rostan ham o‘ta yorqin bo‘lyaptiki, bizgacha yetib keldi. Girassi 7 turning o‘zida 13 gol va 1 assistni amalga oshirdi. Ikki marta het-trik, ikki marta dubl qayd etdi, to‘rt marta Whoscored portali tomonidan 9 dan yuqori bahoga loyiq ko‘rildi. O‘rtacha baho bo‘yicha Girassi Bellinhem, Saka, Mbappe kabi futbolchilarni ham ortda qoldirib, kuchli beshlikning eng yaxshisi bo‘lib turibdi.

«Shtutgart» o‘tgan mavsumda ijarada to‘p surgan futbolchi uchun shu yozda «Renn»ga 9 million yevro to‘lagan edi.  

GUGLIYeLMO VIKARIO (Tottenhem)

Ugo Liorisning yoshi o‘tib, xatolari ko‘payib ketgach, yangi mavsumda «Tottenhem» yangi darvozabon uchun bozorga chiqishi ma’lum edi. So‘nggi daqiqalargacha «Brentford» bilan David Rayya uchun muzokaralar olib borgan, ushbu ispaniyalik darvozabon «Tottenhem»ga o‘tishi vaqt masalasi bo‘lib qolgandi. Ammo ko‘pchilik uchun kutilmaganda, aniqrog‘i, «Brentford» Rayya uchun transfer narxida qattiq turavergach, «shporlar» e’tiborini A Seriyadagi kamtargina «Empoli» futbolchisi Gugliyelmo Vikarioga qaratdi.

Vikario variantni u qadar ishonchli ko‘rinmagandi, asosan autsayderlar darvozasini qo‘riqlagan, Italiya milliy jamoasi safida biror marta ham maydonga tushmagan 27 yoshli darvozabon uchun 19 million yevro to‘landi. Ha, Rayyadan ikki barobar arzon, ammo Liorisning o‘rniga munosibmi?

Hozircha Vikario ishonchni oqlamoqda. «Tottenhem»ning ayni damda turnir jadvalida peshqadam bo‘lib turishida uning hizmati katta – Vikario darvozaga berilgan zarbalarga nisbatan seyvlar nisbati bo‘yicha APLda yetakchi bo‘lib turibdi.

Vikario nafaqat darvoza chizig‘ida, balkim to‘pni oyoqda nazorat qilish, birinchi pas bo‘yicha ham yetarlicha zamonaviy uslubga ega ekanini ham namoyish qilmoqda. «Tottenhem»ning o‘yin uslubini tubdan yangilayotgan Posteko‘g‘li uchun bu ham juda muhim fazilat. 

VIKTOR BONIFASe (Bayyer)

Yevropa Ligasida o‘tgan yili Belgiyaning «Yunion» Sent-Jillua klubi kutilmaganda furror ko‘targan va chorakfinalgacha borgandi. O‘sha bosqichda jamoa «Bayyer»ga to‘qnash keladi va ikki o‘yin natijasiga ko‘ra mag‘lubiyatga uchraydi. Nemislar shu bilan kifoyalanmadi va Germaniyadagi o‘yinda mezbonlar darvozasini ishg‘ol qilgan Viktor Bonifaseni yozda o‘z safiga qo‘shib oldi.

Albatta, agar Patrik Shik jarohatlanmaganda, nigeriyalik 22 yoshli hujumchining bundesligadagi debyuti biroz kechikishi mumkin edi, ammo aytish mumkinki, futbolchi o‘ziga berilgan imkoniyatdan ilk daqiqalardan to‘liq foydalana boshladi. «Leypsig»ga qarshi ilk o‘yinda assist, keyin qatorasiga ikki uchrashuvda dubl. «Bayyer»ning hozirda turnir jadvalida peshqadamlik qilishida hujumchining ahamiyati beqiyos. Bundesligadagi 7 o‘yinda 7 gol va 2 assist – agar Girassining aqlbovar qilmas starti bo‘lmaganda, Bonifase haqida yanada ko‘proq gapirilayotgan bo‘lardi.

20 million yevroga sotib olingan Bonifase katta ehtimol bilan hali Patrik Shik safga qaytgan paytda ham asosiy tarkibdagi o‘rnini osonlikcha berib qo‘ymasa kerak. 

LAMIN YaMAL (Barselona)

Ansu Fatining ikki yil oldin qayd etgan rekordlari salkam yuz yildan beri saqlanib kelganini eslasak, hech bo‘lmasa bir avlod umricha bu rekordlarni buzish imkonsizdek tuyulgandi. Hatto o‘tgan mavsum «Betis»ga qarshi o‘yinda 15 yosh-u 290 kunlik Yamal maydonga tushib, La Liganing bu boradagi rekordini qayd etgan bo‘lsa-da, shunchaki, bir necha daqiqaga maydonga tushgan yosh hujumchi yana «La Masiya»ga qaytib ketadigandek edi.

Usmon Dembelening transferi sabab bo‘ldimi yoki Yamal rostan ham yozda o‘zini ko‘rsatdimi, ishqilib, «Kadis»ga qarshi 2-tur o‘yinida 16 yosh-u 38 kunligida asosiy tarkibda maydonga tushib, bu borada 21 asrdagi La Liga rekordini qayd etdi. Yetti kun o‘tib, «Vilyarreal»ga qarshi o‘yinda assist, 8 oktyabr kuni esa «Granada» bilan o‘yinda ilk gol – va u Ispaniya chempionati tarixida gol urgan eng yosh futbolchiga aylandi. «Portu»ga qarshi YeChL o‘yinida Yamal turnir tarixida boshlang‘ich tarkibda maydonga tushgan eng yosh futbolchiga aylandi. Yamal Ispaniya milliy jamoasiga ham chaqirilib, u yerda boshqa bir jamoadoshi Gavining ham rekordlarini ham yangilab tashladi.

Albatta, gap faqat yosh borasidagi rekordlarda emas, Lamin Yamal rostan ham «Barselona»ning asosiy futbolchilaridan biriga aylanyapti va u tushgan daqiqalarda jamoa o‘yini yanada kuchaymoqda. Hozircha gol va assistlar u qadar ko‘p bo‘lmasa-da, o‘yinga qo‘shayotgan hissasi, hujum tashkil qilishdagi harakatlari orqali Xavi jamoasiga yangi qon olib kirdi deyish mumkin. Gap esa, endigina 16 yoshga to‘lgan futbolchi haqida borayotganini yana bir bor ta’kidlash kerak.

JUD BeLLINGHEM (Real)

Yuz millionlik transferni kashfiyotlar ichiga qo‘shish biroz mantiqsizdek, lekin ishonavering, Bellinghemni oldindan tanigan bo‘lsak ham, uning «Real»dagi o‘yinlari, asosiysi natijalari ko‘pchilik uchun kutilmagan hol bo‘ldi. Barcha musobaqalarda 10 o‘yinda 10 gol va 2 assist – Krishtianu Ronalduning rejimida bormoqda Jud Bellinghem. Ronaldu Madridga «Oltin to‘p» sohibi sifatida tashrif buyurgan bombardir ekanini inobatga olsak, chindan ham Jud – kashfiyot.

Futbolchining iste’dodiga shubha bo‘lmasa-da, uning o‘yin uslubi, ustunlik va kamchiliklari bilan «Real»ga qay darajada mos tushishi mavhum edi. «Real»da Kross – Modrich juftligi markazdagi almashtirib bo‘lmas qism bo‘lib, pressing va himoyalanishda biroz dangasa hisoblangan Jud bu tarkibga olib kirilishi qiyindek ko‘ringandi. Shu o‘rinda Anchelottining eng muhim yutug‘i yana katta sahnaga chiqdi – aynan futbolchilarning ustunliklaridan kelib chiqib ularga imkoniyat beradigan, qachonki futbolchi o‘zi istagan pozitsiyasida futboldan zavq olsa, natijaga erishish mumkinligiga ishonadigan murabbiy Bellinghem uchun Dortmunddagidan farqli bo‘lgan pozitsiya yaratdi. Buning uchun Modrich-Kross tandemidan voz kechganining o‘ziyoq Anchelottti yosh yarimhimoyachiga qanchalik ishonganini ko‘rsatib turibdi.

Bellinghem asosan hujum chizig‘ida, erkin rassom sifatida harakat qilmoqda va Tchuameni, Kamavinga, Valverde kabi futbolchilar u uchun ham «qora ishlar»ni bajarmoqda. Shuning uchun hali Jud, Kroos va Modrich bir vaqtda maydonda harakat qilmayapti. Ha, bir marta, «Atletiko»ga qarshi o‘yinda Anchelotti ularning uchalasini ham boshlang‘ich tarkibda maydonga tushirdi – natijada «Real» mavsumdagi hozircha yagona bo‘lib turgan mag‘lubiyatini qabul qildi.

Bonus: ABBOSBeK FAYZULLAYeV (TsSKA)

O‘zbek futboli muxlislari Abbosni yaxshi bilishsa-da, tan olish kerak, jismoniy kurashlarga urg‘u beriladigan Rossiya chempionatiga bu qadar tez moslashib ketishini ko‘pchilik kutmagan bo‘lsa kerak. Ruslar ham kutmagani tabiiy, o‘zbekistonlik futbolchilarning Moskvani zabt etish harakatlari shu paytgacha o‘xshamagan.

515 daqiqada «Rostov» darvozasiga chiroyli gol, «Krilya»ga qarshi o‘yinda assist, yana ikki marta golga sabab bo‘lgan hujumlardagi muhim uzatma, ikki marta Match Premer talqiniga ko‘ra o‘yinning eng yaxshi futbolchisi unvoni – 20 yoshni qarshilagan Abbos Fayzullayev uchun ajoyib debyut.

«Spartak»ka qarshi o‘yinda u TsSKA tarkibida eng ko‘p masofani (12 km 886 m) bosib o‘tgan futbolchiga aylandi, «Baltika»ga qarshi o‘yinda esa jamoaning yugurish bo‘yicha eng tezkor ko‘rsatkichini qayd etdi. Albatta, bu quruq raqamlardek ko‘rinadi, ammo uning jamoa o‘yiniga ta’siri, kutilmagan qarorlari bilan hujumlarga rang-baranglik olib kirishini mutaxassislar ham e’tirof etishyapti. Bekorga Abbos u yerda «o‘zbek Messisi» laqabini olgani yo‘q.

Afsuski, Rossiyadagi voqealar, mamlakat futbolining hozircha UYeFA musobaqalaridan chetlashtirilgani Abbosga xalaqit berayotgan bo‘lishi mumkin, aks holda balkim, uning yevrokuboklardagi chiroyli harakatlarini kuzatayotgan bo‘lardik va uning Yevropa futbolidagi yurishi yanada ildamroq kechar edi. 

Q.Aslanov