Isroil armiyasi quruqlikdagi operatsiyada HAMAS yetakchilarini qo‘lga olishga umid qilmoqda

G‘azo sektorida bo‘lajak keng ko‘lamli quruqlikdagi operatsiya davomida Isroil armiyasi (TsAXAL) anklavga chuqur kirib borishni va HAMAS yetakchilarini qo‘lga olishni rejalashtirmoqda. Bu haqda Haaretz gazetasiga tayanib Interfax xabar berdi.

«Quruqlikda harbiy operatsiya boshlanadi va vazifani bajarish uchun G‘azo yuragiga kirib borish talab etiladi», dedi TsAXAL vakili. Armiya rasmiylarining qo‘shimcha qilishicha, operatsiya tafsilotlari hali ham harbiy rahbarlar tomonidan muhokama qilinmoqda.

O‘z navbatida, Knessetning nufuzli a’zosi Gideon Saar Channel 12 News telekanaliga bergan intervyusida G‘azo sektori hududi «urush yakuniga qadar kichrayib borishi»ni taxmin qildi. Uning ta’kidlashicha, «xavfsizlik zonasi sifatida tasniflanadigan hudud yaratilishi kerak va unga kirgan har qanday odam darhol to‘xtatilishi lozim».

«Biz kampaniyamiz yakunini barchaga tushunarli qilishimiz kerak. Kim Isroilga qarshi urush boshlasa, o‘z hududini yo‘qotadi», deb qo‘shimcha qildi Saar.

14 oktyabr kuni ertalab Isroil armiyasi rasmiylari G‘azo sektorida keng ko‘lamli kampaniyaga va «ko‘p sonli hujum rejalarini amalga oshirishga tayyorgarlik ko‘rayotganini, uning tarkibiga havo, dengiz va quruqlikdan muvofiqlashtirilgan hujumlar kirishini» aytdi.

Bundan tashqari, Isroil bosh vaziri Binyamin Netanyaxu Isroil janubidagi TsAXAL bazasiga tashrif buyurib, G‘azo sektorida HAMAS tashkilotiga qarshi harbiy operatsiyaning navbatdagi bosqichi yaqinlashayotganini ma’lum qildi. Bir kun avval Netanyaxu o‘z vatandoshlariga murojaati chog‘ida Isroil ushbu operatsiya «qanchalik uzoq davom etmasin, HAMAS yo‘q qilinishiga» va’da bergan edi.