Armaniston hukumati o‘zini «Kreml tomonidan sotilgan» deb hisoblaydi va bu vaziyatda YeI Yerevanga yordam berishni o‘zining burchi deb biladi, deydi Bryussel vakillari. Yevropa Ittifoqi tashqi ishlar kengashi birinchi marta Armaniston xavfsizligini mustahkamlash masalasini muhokama qiladi.
Yevropa Ittifoqi Armanistonda kayfiyat tubdan o‘zgarganini qayd etmoqda. «Armaniston Rossiyaga nisbatan o‘z pozitsiyasini o‘zgartirdi», dedi 20 oktyabr, juma kuni Yevropa Ittifoqining Bryusseldagi yuqori martabali rasmiysi Armaniston bosh vaziri Nikol Pashinyanga tayanib. «Ular Moskva tomonidan sotilganini his qildi va yangi vaziyatga duch keldi. Bizning burchimiz bu o‘zgarishlarda Armanistonga yordam berish va qo‘llab-quvvatlashdir», dedi rasmiy.
23 oktyabr, dushanba kuni Yevropa Ittifoqi tashqi ishlar kengashi birinchi marta Armanistonni qo‘llab-quvvatlash va uning mudofaa qobiliyatini mustahkamlashning turli yo‘llarini muhokama qiladi. Yevropa Ittifoqi Yerevanga moliyaviy, xususan, demokratiya, xavfsizlik hamda kiber va gibrid hujumlarga qarshi turish qobiliyati bilan bog‘liq masalalarda yordam berish niyatida, deya ma’lum qildi Bryussel. «Rossiya Armanistonda nima qilishi mumkinligi haqida o‘ta hushyor bo‘lishimiz kerak», dedi Yevropa Ittifoqining yuqori martabali rasmiysi.
Bryussel Armanistonga hujumdan xavotirda
Yevropa Ittifoqi Armanistonning hududiy yaxlitligi, suvereniteti va xavfsizligini buzishga qaratilgan har qanday urinishlardan xavotirda. «Bu jiddiy tashvish uyg‘otadigan narsa va biz bu haqda prezident Aliyev va Ozarboyjon vakillariga aniq aytdik», dedi rasmiy hamda Bryusselning bu xavotirlarini Bokuga, jumladan, Yevropa kengashi raisi Sharl Mishel, bosh diplomat Jozep Borrel va Yevropa Ittifoqining Janubiy Kavkazdagi maxsus vakili Toyvo Klaar yetkazganini qo‘shimcha qildi.
Shu fonda Yevropa Ittifoqining Armanistondagi fuqarolik monitoringi missiyasi kuchaytirilishi mumkin, dedi Bryusseldagi yuqori martabali amaldor. U 2023 yil yanvar oyida ishga tushdi va 100 ga yaqin xodimga ega.
Yevropa Ittifoqi humanitar va diplomatik yordam ko‘rsatyapti
Bryussel Armaniston va Ozarboyjon o‘rtasida keng qamrovli tinchlik bitimi imzolanishiga intilmoqda. Oktyabr oyi oxiriga qadar Bryusselda Armaniston va Ozarboyjon rahbarlari hamda Yevropa kengashi rahbari Sharl Mishel o‘rtasida sammit bo‘lib o‘tishi kutilmoqda. Bu haqda Ozarboyjon prezidenti Ilhom Aliyev 5 oktyabr kuni Granadada bo‘lib o‘tgan Yevropa siyosiy hamjamiyatining sammitiga tashrifini bekor qilganidan ko‘p o‘tmay ma’lumot berildi. Dastlab u yerda ikki davlat, shuningdek, Germaniya, Fransiya va Yevropa Ittifoqi rahbarlari o‘rtasida qo‘shma memorandum imzolanishi taxmin qilingan edi. Natijada hujjat Aliyevsiz imzolandi.
17 oktyabr kuni Armaniston prezidenti Nikol Pashinyan o‘z mamlakatining Yevropa Ittifoqi bilan yaqinlashishga tayyorligini ma’lum qildi. U Bryusselni Yerevanning islohotlar sohasidagi asosiy hamkori deb atadi va Qorabog‘ aholisi ko‘pchiligining mamlakatga ommaviy ko‘chirilishi natijasida yuzaga kelgan humanitar inqirozni bartaraf etishda ko‘rsatgan yordami uchun minnatdorchilik bildirdi. Rossiya tinchlikparvar missiyasining harakatsizligi tufayli bir hafta ichida 100 mingga yaqin odam Qorabog‘ni tark etgan, dedi bosh vazir.
Harbiy harakatlar avj olgani va minglab odamlarning Qorabog‘dan chiqib ketishiga javoban 2023 yil sentabrida YeI Armanistonga 10 million yevrodan ortiq humanitar yordam ajratdi. 2020 yilda Qorabog‘ va uning atrofida urush boshlanganidan beri Yevrokomissiya shoshilinch humanitar yordam uchun jami 31,2 million yevro yo‘naltirdi.
