«Arsenal» o‘yinida mojaro, «Barsa» bir amalladi. Kun o‘yinlari

«Arsenal»da hakamlarga e’tiroz ko‘p

«Nyukasl» – «Arsenal» 1:0
Gol: 1:0 – 64 Gordon.
«Nyukasl» – Poup, Trippiyer, Sher, Lassels, Bern (Livramento, 46), Bruno Gimaraes, Longstaff, Almiron (Myorfi, 63; Ritchi, 79), Joelinton, Gordon, Uilson (Uillok, 62).
«Arsenal» – Rayya, Uayt (Zinchenko, 73), Gabriel, Saliba, Tomiyasu, Jorjinio (Fabiu Viyeyra, 79), Rays, Haverts, Martinelli, Saka, Nketia (Trossar, 79).
Ogohlantirishlar: Haverts (37), Gordon (37), Longstaff (38), Sher (38), Bruno Gimaraes (88), Livramento (90).

Xalqaro maydonlarda «Milan» bilan safarda durang,  «PSJ» ustidan yirik g‘alaba, Angliyada «Siti» va «MYu» mag‘lub etilishi... Oq-qoralarning navbatdagi grandga qarshi o‘yini turning markaziy uchrashuvi bo‘lishi kutilayotgandi va amalda ham muxlislar bu o‘yinda zerikib qolishmadi.

Eddi Hau hafta o‘rtasida «MYu»ga qarshi o‘yinda (3:0) rotatsiya qilishga harakat qildi, ammo u qadar o‘xshamadi — jarohatlar tufayli «qarg‘alar»ning zayavkasi qisqardi va «Nyukasl»ning asosiy tarkib futbolchilarining aksari o‘sha kuni ham maydonga chiqishiga to‘g‘ri keldi. «Arsenal»ga qarshi o‘yinda Longstaff, Almiron, Joelinton va boshqalar ham boshlang‘ich tarkibdan o‘rin oldi, bu yigitlar bir necha kundan keyin «Borussiya» bilan ham o‘ynashi kerak.

Mikel Arteta ham kubok o‘yinida rotatsiya qilgandi, ammo «Vest Hem»ga qarshi o‘yinda hisob yiriklashib ketgach, ikkinchi bo‘limda asosiy futbolchilarini baribir maydonga tashlashga qaror qildi va yakunda Edegor bitta javob goli urdi (1:3). «Sent-Jyeyms Park» stadioniga londonliklar toliqqan holda hamda ikki yetakchi futbolchisi Jyezus va Edegorsiz tashrif buyurdi.

Ikki klub ham bir necha frontda kurash olib borayotgani tufayli birinchi bo‘limda golli vaziyatlar deyarli bo‘lmadi, muxlislar sifatli futbol o‘rniga to‘qnashuvlar guvohiga aylandi. Bo‘lim o‘rtalaridan o‘tib hakam o‘yin tizginini qo‘ldan chiqarib yubordi.

Haversning foli o‘yindagi burilish nuqtasiga aylandi. «Arsenal»ning germaniyalik yarimhimoyachisi qanotda ikki oyog‘i bilan Longstaffga podkat qildi va bu maydonda janjal keltirib chiqardi. Hakam Styuart Attuell qoidabuzarga sariq kartochka ko‘rsatdi (futbolchi raqibga oyoqlarini gazondan uzmagan holda bordi va butsasining tag qismi bilan zarba bermadi), mezbon futbolchilar esa faollik bilan qizil kartochka ko‘rsatishni talab qilishdi, natijada hakam ularni tinchlantirish uchun uch kishiga - Entoni Gordon, Fabian Sher hamda jabrlanuvchi Longstaffning o‘ziga sariq kartochka ko‘rsatdi. 

Lekin mezbonlarning eng agressiv vakili Bruno Gimaraynsh birinchi bo‘limda hatto sariq kartochka ham olmadi, u avvaliga autdan to‘p tashlab berilganida, maydonda ikki to‘p borligi holatida ulardan birini mo‘ljallab Haversga qarata tepdi.

Boshqa bir vaziyatda esa Jorjinio pas berayotganida ortdan kelib uning boshiga tirsagi bilan urib o‘tdi va hakamlar bu vaziyatlarni e’tiborsiz qoldirdi.

Braziliyalik futbolchi bu qiliqlarini ikkinchi bo‘limda ham davom ettirdi, lekin bo‘limdagi asosiy epizod uning ishtirokisiz bo‘ldi. Ikkinchi bo‘limda yomg‘ir kuchayishi ham o‘yin sifatiga ta’sir qildi, mezbonlar hujumlar sonini ko‘paytirgan bo‘lsa ham, ko‘p hollarda Gabriel boshchiligidagi himoyadan o‘ta olmadi.

Bunday «qirpichoq», bahslarga boy va asabiy o‘yin taqdirini bir gol hal qilishi ko‘rinib turgandi va bu golni «Nyukasl» urdi, garchi uni bekor qilish uchun hakamda asoslar yetarlicha bo‘lgan bo‘lsa ham.

Ikkinchi bo‘limda zaxiradan tushgan Myorfi qanotdan «Arsenal» jarima maydoniga yaqinlashib zarba berdi, ammo to‘p darvoza sohasiga to‘g‘ri bormasdan narigi qanot tomon yo‘naldi — bu vaziyatda mehmon jamoa himoyachilari to‘p chiziqdan o‘tib maydon tashqarisiga chiqib ketganiga shubha qilmasdan o‘yindan uzilib qoldi. Uillok esa to‘pga yetib bordi va uni jarima maydoni ichiga oshirdi. Keyin kurash boshlandi — Joelinton to‘pni qabul qildi, Gabrielni gazonga yiqitdi va Gordonga uzatdi — u esa bo‘sh darvozaga to‘pni kiritdi, chunki darvozabon Rayya to‘pni ilib olish uchun oldinga chiqqan va joyiga qaytishga ulgurmagandi.

Bu vaziyatda gol hisoblanishi uch yarim daqiqa davomida, to‘rt holat bo‘yicha tekshirildi.

1. To‘p maydondan chiqib ketgani. Avvaliga to‘p jarima maydoniga uzatilishidan oldingi epizod tekshirildi.

Stop-kadrda to‘p maydon chizig‘ini kesib o‘tgandek ko‘rinadi, ammo hakamlar 100 foizga kesib o‘tmagan deb topishdi.

2. Joelinton fol qilgani. Braziliyalik yarimhimoyachi raqib himoyachisi Gabriel bilan to‘p uchun kurashdi, «Arsenal» futbolchisi yiqildi. Hakamlar qoidabuzarlik ehtimoli bo‘yicha vaziyatni tekshirishdi – va folni ko‘rishmadi.

3. Joelinton qo‘l bilan o‘ynagani. Videohakamlar Joelinton bu vaziyatda qo‘l bilan o‘ynamagan deb topishdi.

4. Gordondagi ofsayd. Standart protsedura (angliyalik arbitrlarda bu muammo juda ko‘p uchramoqda). Bu juda murakkab vaziyat edi, chunki Rayya oldinga chiqib ketgan – demakki ofsayd to‘p joylashuviga qarab o‘lchalanadi.

Hakamlar Gordon to‘pdan orqaroqda turgan deb hisoblashdi – bu esa to‘g‘ri joylashuv hisoblanadi.

Londonliklarning eng asosiy e’tirozi birinchi vaziyat bo‘yicha edi – stop-kadrda to‘p maydonda qolgan yoki qolmaganini tushunish qiyin. Lekin ofsayd bilan bog‘liq vaziyat ham oddiy emasdi: Joelinton qaysi pallada oxirgi bor to‘pga tekkani va Gordondagi o‘yindan tashqari holatni aniq ko‘rsatuvchi stop-kadr bo‘lmadi.

Bosh hakam esa bu holatlarning hech birini monitoring qarshisiga borib shaxsan ko‘rmadi va videohakamlarning so‘zlari bo‘yicha qaror chiqarib, golni inobatga oldi va Angliyada mavsum boshidan buyon ikkinchi yirik hakamlik mojarosi yuzaga keldi. 

Qo‘shib berilgan sakkiz daqiqa davomida hech kim hech narsa qila olmadi. APL mavsumidagi ilk mag‘lubiyatini qabul qilib olgan «Arsenal» bu o‘yinda raqib darvoza sohasiga birgina aniq zarba yo‘lladi — mavsumdagi eng yomon ko‘rsatkichlardan biri. Endi Arteta jamoasi «Siti»ni 3 ochko oldinga chiqarib yuborgan, «Tottenhem» va «Chelsi» o‘rtasidagi o‘yindan keyin «shporlar» bilan oradagi farq besh ochkoga yetishi ham mumkin. Mavsum startida uch bor yutqazgan Eddi Hau jamoasi esa oltinchi o‘ringa ko‘tarildi va top-4 bilan farqni to‘rt ochkoga qisqartirdi.

Fernandesh «MYu»ni jonlantirdi

«Fulhem» — «Manchester Yunayted» 0:1
Gol: Fernandesh (90+1). 
«Fulhem» – Leno, Kastan, Rim, Bassi, Robinson, Uilson (Kerni, 90), Pereyra (Dekordova-Rid, 81), Palinya, Villian (Lukich, 76), Ivobi (Ximenes, 90), Rodrigo Muniz (Vinisius, 76).
«Manchester Yunayted» – Onana, Uan-Bissaka, Evans, Maguayr, Dalot, Eriksen (Maunt, 79), Fernandesh, Maktominey, Antoni (Pellistri, 63), Garnacho (Varan, 90+3), Hoylund (Marsiyal, 79).
Ogohlantirishlar: Robinson (31), Pereyra (66), Palinya (66), Garnacho (67), Ivobi (82), Uilson (85).

Jamoalar o‘yin sur’atini oshirishga ulgurmasidan tanaffus qilishga to‘g‘ri keldi. Gap «MYu»ning goli bekor qilinganida, vaziyat bir necha daqiqa davomida o‘rganib chiqilgach VAR xonasidagilar mas’uliyatni zimmasiga olishni istamadi, bosh hakam esa monitorga yo‘l oldi. Yakunda hakam Eriksen jarima zarbasini ijro etganida ofsayd holatida bo‘lgan Maguayr to‘p uchun kurashishi to‘g‘ri holatda bo‘lgan va Maktominayga golli uzatma bergan Garnachoga ustunlik taqdim etgan deb topdi.

Birinchi bo‘limda boshqa diqqatga sazovor vaziyatlar bo‘lmadi. Tanaffusdan keyin ham xavfli vaziyatni 61-daqiqagacha kutishga to‘g‘ri keldi, Onana Uilsonning xavfli zarbasini qaytardi. Nigeriyalik posbon keyin yana bir necha bor qutqardi, o‘yin golsiz durang bilan yakunlanishi muqarrardek ko‘rinayotgan pallada, Pellistrining jonbozligidan keyin Brunu Fernandesh yo‘llagan zarba «MYu»ga uch ochko taqdim etdi. «Man Siti» va «Nyukasl»dan (Liga kuboi) uchralgan yirik mag‘lubiyatlardan keyin Erik ten Hag jamoasi yengil tin olishi mumkin. Chempionlar ligasida «Kopenhagen»ga qarshi kechadigan muhim o‘yin oldidan.

«Manchester Siti» — «Bornmut» 6:1
Gollar: Doku (30), Silva (33, 84), Akanji (37), Foden (64), Ake (89) — Sinisterra (74). 
«Manchester Siti» – Ederson, Uoker, Stounz (Lyuis, 71), Ake, Akanji, Kovachich, Silva (Bobb, 85), Rodri (Fillips, 71), Holand (Foden, 46), Alvares (Nunesh, 71), Doku.
«Bornmut» – Radu, Aarons, Kelli, Mifem (Senesi, 46), Zabarniy, Kerkez, Kristi, Taverne (Sinisterra, 72), Billing (Semeno, 71), Skott (Rotuell, 44), Solanke (Klyuyvert, 85).
Ogohlantirish: Billing (32).

«MYu»ning shanba kungi o‘yini katta qiyinchilik bilan o‘tgan bo‘lsa, shaharning boshqa bir jamoasi istaganini qildi. «Bornmut»ga qarshi bu o‘yinda ham «shaharliklar»ning juda oson g‘alabasi qayd etildi - ushbu jamoalar jami 14 o‘yin o‘tkazgan va 14 o‘yinda ham manchesterliklar g‘alaba qozongan, to‘plar nisbati - 46:8, oxirgi ikki o‘yinda 4:0 va 4:1 hisoblari qayd etilgan. Bu safar esa ushbu qarama-qarshilikdagi eng yirik hisob qayd etildi, bungacha eng yirik hisob jamoalarning 2015 yildagi ilk o‘yinida kuzatilgan - 5:1. Bundan tashqari, to‘rt uchrashuv 4:0 hisobida yakunlangan.

Bu safargi o‘yinda Holandning gol yoki golli pasiga ham hojat qolmadi. Qolaversa, norvegiyalik hujumchi birinchi bo‘lim oxirida jarohat oldi va Xosep Gvardiola o‘z to‘purarini zaxiraga oldi. Shu kuni skripkachi rolini Doku ijro etdi. Belgiyalik futbolchi avvaliga hisobni ochdi, keyin esa to‘rtta golli uzatmani amalga oshirdi, uning yoshida (21 yoshu 161 kun) APLda hali hech kim bunday natija qayd eta olmagan. Kechaning yana bir qahramoni Bernardu Silva bo‘ldi. Portugaliyalik futbolchi ikkinchi golini urganidan keyin olqishlar ostida almashtirildi. Bu natijadan keyin «Siti»ning uy o‘yinlaridagi g‘alabali seriyasi 22 ta o‘yinga yetdi. «Shaharliklar» «Sanderlend»ning 1890-1892 yillar oralig‘ida o‘rnatgan Angliya rekordini takrorlashiga ikkita o‘yin qoldi.

Ispaniya: «Barsa»da qiyin g‘alaba, «Jirona» yana birinchi

Osasuna — Jirona 2:4
Gollar: Budimir (25, 55) — Martin (16), Dovbik (71), Tsigankov (80), Garsiya (90).
Osasuna – Errera, Areso, David Garsiya, Katena, Moxika, Penya (Barxa, 83), Moyses Gomes (Ibanes, 75), Torro (Monkayola, 90), Oros (Raul Garsiya, 83), Chimi Avila (Ruben Garsiya, 75), Budimir.
Jirona – Gassaniga, Yan Kouto (Tsigankov, 70), Blind, Erik Garsiya, Martines, Migel Gutiyerres, Aleish Garsiya, Errera, Martin (Portu, 85), Savio, Dovbik (Stuani, 85).
Ogohlantirishlar:  Chimi Avila (40), Katena (41), Budimir (51), Martines (72), Errera (85), Torro (87), Stuani (90+5).

Kamida «Real»ning yakshanba kungi o‘yini yakunlanganiga qadar «Jirona» turnir jadvali yetakchisi bo‘lib qoladi. Pamplonadagi o‘yin kataloniyaliklar uchun ancha qiyin boshlandi, Martinning goliga mezbonlar Budimirning ikki goli bilan javob qaytarishdi. 70-daqiqada ham «Osasuna» hisobda oldinda borayotgandi, ammo qolgan vaqt ichida Michel Sanches jamoasi uch gol urishga erishdi. Murabbiy almashtirishlarda topqirlik qildi, Tsigankov g‘alaba goli muallifi bo‘ldi, Portu esa to‘rtinchi golga assistentlik qildi. O‘yinning asosiy qahramoni esa yana bir ukrainalik futbolchi Artyom Dovbik bo‘ldi, u 1 gol va 2 golli pas bilan mavsumdagi natijalarini 6+4 ko‘rinishiga keltirdi. U chempionatda samaradorlik bo‘yicha faqat Jud Bellinghemdan (10+2) ortda bormoqda.

Sentyabr oyida «Real»dan uchralgan 0:3 hisobidagi mag‘lubiyatdan keyin «Jirona» barcha turnirlardagi natijalar qo‘shib hisoblanganda besh g‘alabadan iborat seriya qayd etdi. 12 turda jamoa o‘n g‘alabaga erishgan, agar «Barselona» va «Real» hisobga olinmasa, la ligada bunday startni avval faqat ikki jamoa qayd etgan. «Betis» 1934 yilda va «Atletiko» — 2012 hamda 2013 yillarda. Ikkinchi holatda «matraschilar» 11 uchrashuvda g‘olib bo‘lishgandi.

«Real Sosiyedad» — «Barselona» 0:1
Gol: Arauxo (90+3). 
«Real Sosiyedad» – Remiro, Traore (Elustondo, 63), Le Norman, Subeldiya, Munos, Mendes, Merino, Subimendi, Kubo, Oyarsabal (Fernandes, 83), Barrenechea (Cho, 79).
«Barselona» – ter Stegen, Kanselu (Rafinya, 69), Martines, Kunde, Arauxo, Balde, Gundo‘g‘an, Gavi, Fermin (Ferran Torres, 57), Felish (Yamal, 69), Levandovski (Pedri, 57).
Ogohlantirishlar: Felish (49), Mendes (49), Martines (60), Subeldiya (74), Subimendi (85), Gavi (86). 

San-Sebastiyanda o‘ynash barchaga, shu jumladan «Barselona»ga ham qiyin. Agar ter Shtegen bo‘lmaganida, ko‘k-anorranglilar ilk daqiqadayoq gol o‘tkazib yuborishi mumkin edi. Keyingi hujumda esa Kunde to‘pni Oyyarsabalga sovg‘a qildi. Uch daqiqalik bosim burchakdan to‘p o‘ynalishi va Merinoning zarbasi darvoza ustunidan bir necha santimetr naridan o‘tib ketishi bilan yakunlandi.

Basklar jamoasi ustozi Imanol Alguasil Xavi uchun bu mavsumdagi eng qiyin daqiqalarni taqdim etdi. Qachonlardir La Masiyada bo‘lgan yaponiyalik Kubo esa kataloniyalik barcha yulduzlarni soyasida qoldirdi. 20 daqiqa davomida mehmonlar raqib jarima maydoniga kira olishmadi. Ammo «Barsa» butun o‘yin davomida ojiz ahvolda qolmasligi tayin edi va 20-daqiqaga kelib Remiro darvozasi yaqinida ilk xavfli vaziyat yuzaga keldi. Faqat Gavi raqibni nozik harakat bilan ortda qoldirganidan keyin to‘pni sheriklariga yetkazib bera olmadi.

Umuman olganda, bu golgacha bo‘ladigan klassik o‘yin edi, o‘yin davomida ikki jamoa ham arbitrdan penalti so‘rashdi, «Real Sosiyedad» himoyachilari hamda ter Shtegen tabloda nollar saqlanib qolishi uchun barcha ishni qilishdi. Ikkinchi bo‘limda esda qolarli vaziyatlardan biri avgust oyidan buyon jarohatini davolash bilan mashg‘uo bo‘lgan Pedrining maydonga tushishi bo‘ldi.

U jamoa uchun naqadar muhimligini so‘nggi daqiqalar ko‘rsatib berdi, ushbu havbek Gavi uchun yaqqol golli vaziyat yaratib berdi. Gavining zarbasini Remiro to‘sdi, ammo bu hal qiluvchi palla emasdi. Qo‘shimcha daqiqalarda Arauxoning golini avvaliga hisoblashmadi. Futbolchining o‘zi ham ofsayd holatida qolganiga rozidek edi, ammo VAR Kataloniya poytaxtiga bayram tuhfa etdi. Basklar esa top-raqiblarga qarshi a’lo darajadagi futbol namoyish etishiga qaramasdan, «Real» va «Atletiko» ortidan «Barsa»ga ham yutqazdi.

Italiya: «Napoli» Osimhensiz ham yaxshi o‘ynamoqda

«Salernitana» — «Napoli» 0:2
Gollar: Raspadori (13), Elmaz (82).
«Salernitana» – Ochoa, Matssokki (Butheym, 81), Fasio (Danilyuk, 69), Pirola, Bradarich, Kandreva (Kastanos, 77), Kulibali, Lengovski (Boxinen, 69), Tshauna, Dia, Ikvuyemesi (Styuart, 69).
«Napoli» – Meret, Di Lorenso, Rrahmani, Estigor, Olivera, Lobotka, Zelinski (Kayuste, 86), Zambo-Angissa, Politano (Lindstrem, 77), Kvaratsxeliya (Elmaz, 69), Raspadori (Simeone, 68).
Ogohlantirishlar: Matssokki (68), Di Lorenso (88).

«Napoli» hozircha jarohat tufayli safdan chiqqan Osimhensiz ham uddalamoqda, hujum markazida o‘ynayotgan Raspadori esa o‘ziga taqdim etilgan imkoniyatdan ideal darajada foydalanmoqda. O‘tgan yili «Sassuolo»dan transfer qilingan italiyalik forvard jiddiy raqobat sharoitida o‘zini ko‘rsatishi qiyin bo‘layotgandi. Bir tomondan, u Chempionlar ligasi guruh bosqichida to‘rt gol urgandi. Boshqa tomondan — A seriyada o‘tgan mavsum o‘yinlarida atigi ikki bor darvozani ishg‘ol etgan. Ammo u bu natijani yangi mavsum startidayoq yangiladi va Raspadori faoliyatida ilk bor qatorasiga uch o‘yinda gol urdi. «Salernitana» bilan o‘yinda ham u kerakli vaziyatda kerakli joyda ochildi va uzoq burchakni aniq nishonga oldi, o‘yin oxirida esa Lobotkaning sa’y-harakatlari bilan hisobdagi ustunlik mustahkamlandi.

«Atalanta» — «Inter» 1:2
Gollar: Skamakka (61) — Chalxono‘g‘li (40, penalti), Martines (57).
«Atalanta» – Musso, Dzappakosta (Hatebur, 55), Jimshiti, Kolashinats (Pashalich, 55), Skalvini (Toloi, 62), Rujyeri, de Ron, Ederson, Kopmeyners (Muriel, 80), Lukman (de Ketelare, 80), Skamakka.
«Inter» – Zommer, Dumfris, de Vrey, Acherbi, Pavar (Darmian, 33), Dimarko (Karlos Augusto, 70), Mxitaryan (Frattezi, 70), Chalxono‘g‘li (Aslani, 86), Barella, Tyuram, Martines (Sanches, 86).
Ogohlantirishlar: de Ron (26), Kolashinats (35), Toloi (85), Dumfris (89).
Chetlatish: Toloi (90+2).

«Inter» uchun Bergamodagi o‘yin Pavarning jarohati bilan boshlandi, u ikkinchi qavatdagi kurashdan keyin shikastlandi. Uning o‘rniga tushirilgan Darmian esa o‘yinga shu qadar faollik bilan kirishib ketdiki, arbitr uning «Atalanta» darvozaboni Musso bilan to‘qnashuvidan keyin 11 metrlik nuqtani ko‘rsatdi. Ikkinchi bo‘lim ham maydon egalari uchun yoqimsiz holatlar bilan boshlandi. Lautaro Martinesning bir goli ofsayd tufayli inobatga olinmadi, ammo boshqa bir epizodda argentinalik hujumchi to‘pni uzoq burchakka aniq yo‘lladi. «Inter» ikki gol ustunligiga erishgandan keyin biroz bo‘shashdi, ammo Skamakkaning javob golidan keyin «neradzurrilar» mudofaaga e’tibor bilan qarashga majbur bo‘lishdi. Pavar esa o‘yin yakunlanganidan keyin jamoadoshlari bilan mehmon fanatlar joylashgan sektorga keldi va bu orqali jiddiy jarohatdan qutulib qolganini namoyish etdi.

«Milan» — «Udineze» 0:1
Gol: Pereyra (62, penalti).
«Milan» – Menyan, Kalabriya, Tomori, Tiav, Florensi, Musa (Romero, 82), Krunich (Adli, 46), Reynders (Loftus-Chik, 67), Jiru, Yovich (Okafor, 46), Leau.
«Udineze» – Silvestri, Ebosele (Ferreyra, 84), Kabasele, Biyol, Peres, Zemura (Kamara, 84), Uolas, Payyero (Lovrich, 72), Samarjich (Toven, 78), Pereyra, Saksess (Lukka, 84).
Ogohlantirishlar: Krunich (18), Peres (54), Kabasele (55).

Italiyada kun sensatsiya bilan yakunlandi, «Milan» uchinchi o‘rinni o‘zida saqlab qolgan bo‘lsa-da, penaltidan gol o‘tkazib «Udineze»ga o‘z uyida yutqazdi. Stefano Pioli jamoasi uchun bu «San-Siro»da gol urmasdan qatorasiga ikkinchi bor mag‘lub bo‘lishi, bunaqasi «rossnonerilar»da 2012 yildan buyon kuzatilmagan. Jamoa so‘nggi besh uchrashuvda atigi bir g‘alabaga erishdi, ammo zaxira ochkolari turnir jadvalining yuqori qismida qolishni ta’minlamoqda.

Germaniya: «Bayyer»ning rekord bilan yakunlangan trilleri

«Hoffenhaym» — «Bayyer» 2:3
Gollar: Shtax (56), Veghorst (58) — Virs (8), Grimaldo (45+1, 70).
«Hoffenhaym» – Baumann, Fogt, Akpoguma, Kabak, Premel, Beker (Kramarich, 78), Shtah, Skov (Bebu, 79), Byulter, Veghorst, Bayyer.
«Bayyer» – Gradetski, Frimpong, Ta, Tapsoba, Kossunu (Stanishich, 46), Grimaldo, Jaka, Hofmann (Andrix, 80), Palasios, Virts, Bonifase.

«Mayns» — «Leypsig» 2:0
Gollar: Li Je Son (76), Barreyro (82). 
«Mayns» – Tsentner, Lyaytsh, van der Berg, Gilavogi (da Koshta, 16), Kasi, Fernandesh, Kor (Kraus, 68), Li Je Son, Barreyro, Rixter (Barkok, 68), Onisivo.
«Leypsig» – Blasvih, Henriks, Klostermann, Lukeba, Simakan, Raum, Forsberg, Aydara, Kampl, Shlager, Baumgartner (Verner, 67), Simons, Poulsen, Openda (Sheshko, 67).

Turning asosiy uchrashuvidan oldin «Bavariya» va «Borussiya»ning raqiblari o‘z uchrashuvlarini o‘tkazishdi. «Leypsig» Maynsdagi o‘yin oxirida o‘tkazib yuborilgan gollar tufayli mag‘lub bo‘lgan bo‘lsa, «Bayyer» va «Hoffenhaym» to‘qnashuvi muxlislarga haqiqiy triller namoyish etib berdi. Chempionat peshqadami hisobni osonlik bilan ochdi, Bonifas va Virs uyushtirgan kombinatsiya gol bilan yakunlandi. Grimaldo birinchi bo‘limga qo‘shib berilgan daqiqalarda leverkuzenliklarning ustunligini oshirganida bu mezbonlar uchun nokautdek ko‘ringandi.

Ammo ikkinchi bo‘limda ikki daqiqa ichida barchasi o‘zgarib ketdi va «Bayyer» yo‘q joydan o‘ziga muammo yaratdi. Aniqrog‘i Gradetski avvaliga so‘nggi himoyachi roliga kirishib, jarima maydoni tashqarisiga chiqib to‘p uzatishda xatoga yo‘l qo‘ydi va u bo‘sh qoldirgan darvoza uzoq masofadan aniq nishonga olindi. Keyingi vaziyatda esa ustundan qaytgan to‘pni Veghorst deyarli bo‘sh qolgan darvozaga joylab qo‘ydi. Lekin bu gollardan keyin mehmonlar o‘zini yo‘qotib qo‘ymadi va o‘ziga ishonchni tiklay oldi. 70-daqiqada Bonifas maydon tashqarisiga chiqib ketayotgan to‘pni to‘xtatib qolib, hujumni davom ettirdi, Grimaldo esa chap oyog‘ida yo‘llagan zarbasi bilan yuqori burchakni aniq nishonga oldi. Ispaniyalik futbolchi klubning o‘n g‘alabadan iborat seriya bilan o‘z rekordini o‘rnatishini ta’minladi.

«Borussiya» Dortmund — «Bavariya» 0:4
Gollar: Upamekano (4), Keyn (9, 72, 90+3).
«Borussiya» D – Kobel, Hummels, Shlotterbek, Ryuerson, Roys, Zabitser, Brandt (Mukoko, 66), O‘zjan (Nmecha, 57), Volf (Zyule, 46), Malen (Adeyyemi, 57), Fyullkrug (Aller, 79).
«Bavariya» – Noyyer, Mazraviy, Upamekano (Pavlovich, 60), Kim Min Je, Devis, Goretska, Laymer, Koman, Sane (Myuller, 89), Musiala (Shupo-Moting, 89), Keyn.
Ogohlantirishlar: Sane (22), Hummels (61), Ryuerson (74), Zabitser (76), Laymer (85).

«Bavariya» hafta o‘rtasida Germaniya kubogida uchinchi divizion vakiliga sharmandalarcha yutqazgandi. Dortmundlik muxlislar chempionning navbatdagi muvaffaqiyatsizligiga guvoh bo‘lishni istardi, ammo shanba kuni «Signal Iduna Park»ka mehmonlar yaralangan sher kabi kelishdi. «Borussiya» esa raqibning kayfiyatidan bexabar holda ochiq futbol taklif etdi.

Burchak zarbasi ijro etilganida Upamekano tezkor gol urdi. Bir necha daqiqa o‘tib — namunali qarshi hujumda yana bir gol o‘tkazildi. Uni tovoni orqali pas berish bilan boshlagan Sane «asalarilar»ning pressingini barbod qildi va hujum yakunida darvozaning bo‘sh burchagi qarshisiga chiqarilgan Keyn hisobdagi farqni oshirdi. Goretska qaychi uslubidagi zarbasi bilan hisobni birinchi bo‘limdayoq yirik ko‘rinishga keltirib qo‘yishi mumkin edi. «Borussiya»da esa birinchi bo‘limda faqat birgina imkoniyat bo‘ldi, Tomas Tuxel esa hatto shunday ustunlik kuzatilgan o‘yinda ham arbitr bilan bahslashib ogohlantirish olishga ulgurdi. Balki u ikkinchi bo‘lim o‘ta qiyin kechishini sezgandir?

Edin Terzichning tanaffusdagi o‘zgartirishlaridan keyin o‘yin chindan ham o‘zgardi. Kardinal darajada bo‘lmasa ham, dortmundliklar raqib darvozasi tomon xavf sola boshlashdi, agar Noyyerning mahorati bo‘lmaganida, Roys «qora-sariq» formadagi 400-o‘yinida gol urishi kerak edi. Ammo Keyn Germaniyadagi uchinchi het-trigini nishonlab, intrigani o‘ldirdi va bundesliganing legionerlarga tegishli bo‘lgan qadimiy rekordlaridan birini yangiladi. 60 yil muqaddam «Shalke» forvardi Klaus Matishak ham ushbu chempionatda uch bor uchtadan gol urgandi, ammo bunday tezlikda — debyutidan keyingi 10 o‘yinda 15 gol urishga hech kim muvaffaq bo‘lmagan. Hozirgi «Borussiya» — bahorda ham sovrin uchun kurashadigan jamoa emas. Bu mavsumda «Bavariya»ga leverkuzenliklar asosiy raqib bo‘ladi.

Kun statistikasi

• «Vest Hem» yarimhimoyachisi Bouen APL tarixida mavsum boshidan buyon oltita safar o‘yinida gol urgan ilk futbolchi bo‘ldi.
• «Byornli» uy uchrashuvlarida qatorasiga olti bor mag‘lub bo‘ldi. Angliya futbolida yuqori ligada hali hech bir jamoada bunday yomon start kuzatilmagandi.
• «Brayton» APLda 15 o‘yindirki darvozasi daxlsizligini saqlay olmayapti. Bu «chaykalar»ning 1996 yildan buyon eng yomon natijasi, o‘tgan asr oxirida jamoa qatorasiga 17 tur o‘yinida gol o‘tkazgandi.
• «Borussiya» himoyachisi Hummels nemis klassikasida 28-o‘yinini o‘tkazdi va Mixael Tsorkning rekordini takrorladi.