«Arsenal» «Chelsi»ga imkon qoldirmadi, «Barsa» raqiblarni ayamayapti. Kun oʻyinlari

Xabi Alonso Lavia va Hato oʻrniga Gyusto va Chavarriyani tushirdi. Mehmonlar tez-tez raqib jarima maydoniga yaqinlashib kela boshladi. Ammo «Arsenal» jarima maydoniga qamalib olmadi va muntazam ravishda javob hujumlarini amalga oshirdi. Ayniqsa Sakada yaxshi vaziyatlar boʻldi: avvaliga Martines uning jarima maydoni tashqarisidan yoʻllagan zarbasini qaytardi, keyin esa uning olis burchakka yoʻllangan zarbasiga ham yetib bordi.

«Arsenal» qolgan vaqt mobaynida oʻyinni nazorat qildi va oʻz uslubida raqibni ilojsiz qoldirdi. Bunda zaxira imkoniyatlari ham qoʻl keldi. Mezbonlar himoyasi raqibning havodan va yerdan uzatmalarini osonlik bilan bartaraf etishdi, jamoaning yangi futbolchisi Konsa esa bir necha bor jamoadoshlarining xatosini tuzatdi.

Mehmonlar oʻyin oxirida juda xavfli vaziyatga ega boʻlishdi. Zaxiradan tushgan Estevao himoyachidan qochib ketib, kuchli zarba yoʻlladi, ammo Rayya toʻsin ostiga kirib ketayotgan toʻpni katta qiyinchilik bilan qaytarib qoldi.

«Arsenal» gʻalabani saqlab qoldi va turnir jadvalida «Siti»ga yetib oldi. «Chelsi» esa munosib qarshilik koʻrsatdi, ammo oʻzaro oʻyinlardagi statistika yanada yomonlashdi – «Chelsi» 5 yildan buyon shimollik qoʻshnilarini magʻlub eta olmayapti, soʻnggi 12 oʻyinda «Arsenal» 9 gʻalaba va 3 durang qayd etgan.

«Everton» – «Manchester Yunayted» 2:2
Gollar: Mbeumo, 46 (0:1). Jorj, 83 (1:1). Sheshko, 88 (1:2). Meytland-Nayls, 90+6 (2:2)
«Everton»: Pikford, Brantueyt, Tarkovski, Mikolenko, Ryol (Hekni, 75), Garner (Meytland-Nayls, 77), Armstrong, Dyusberi-Holl, Jorj, Jonson (Grilish, 66), Barri
«Manchester Yunayted»: Lammens, Maguayr, Martines, Shou (Mazraviy, 90+1), Dalot (Yoro, 84), Tilemans, Maynu (Santos, 84), Brunu Fernandesh, Reshford (Dorgu, 70), Mbeumo, Kunya (Sheshko, 70)
Ogohlantirishlar: Armstrong, 13. Jonson, 34. Ryol, 64 – Shou, 62. Maguayr, 79. Dalot, 81

«MU» mavsum startidagi uchta oʻyinni uch xil oʻtkazdi. Birinchi turda chempionshipdan chiqqan debyutant «Hall Siti» qarshisida ojiz qolgandi, keyin esa chempionshipning boshqa bir vakili «Ipsvich» bilan oʻyinda gollar shousini uyushtirdi. Bu ikki turdagi raqiblardan kelib chiqib, tahlil qilish qiyin edi. Kerrik shogirdlari uchun haqiqiy sinov Devid Moyes boshqaruvidagi «Everton» maydoniga qilingan safar boʻldi. Oʻyin maydon markazida Barri bilan havodagi yakkakurash vaqtida Maguayrning burni qonashi bilan boshlangani ham bu oʻyin qiyin boʻlishidan darak edi. Bir necha daqiqa davomida Harrida qon oqishini toʻxtatishdi, shundan keyin u oʻyinni davom ettiradigan boʻldi.

Birinchi boʻlimda «qizil iblislar» imkon tugʻilgan zahoti zarba berishga harakat qilishdi. Dastlab Brunu Fernandeshning jarima maydoni tashqarisidan yoʻllagan zarbasidan keyin toʻp toʻsinga bordi, Mateus Kunya toʻpni ancha yuqorilatib tepdi, ikkinchi boʻlim boshida esa Mbeumo olis burchakni aniq nishonga oldi. Keyin Kunya ikkinchi golni urib, amalda oʻyin taqdirini hal qilishi mumkin edi, ammo Tarkovski jarima maydoni ichida podkat ishlatib, toʻpni uning oyoqlaridan olib qoʻydi. Bu epizod oʻyinning burilish nuqtasiga aylandi va oʻyinda qolgan mezbonlar hisobni tenglashtirishdi. Jamoaning yozgi xaridlaridan boʻlgan Jorj Lammensning yaqin burchagiga qaytarib boʻlmas zarba yoʻlladi.

Ammo bu yakuniy hisob emasdi – oʻyinning asosiy vaqti yakunlanishi arafasida Shou qanotdan toʻpni Sheshkoning boshiga yetkazib berdi va slovakiyalik hujumchi aniq harakat qildi. Ammo bu ham hali yakun emasdi. Yozgi transferlar oynasining soʻnggi kunida Fransiyadan APLga qaytgan Meytlend-Naylz oʻyinga qoʻshib berilgan daqiqalar davom etayotganida mezbonlarni magʻlubiyatdan qutqarib qoldi. «Arsenal» tarbiyalanuvchisi boʻlgan yarimhimoyachi jarima maydoni ichkarisidan chiqib kelgan toʻpni toʻqqizlikka joylab qoʻydi, Lammensda toʻp yoʻnalishini kuzatib turishdan boshqa chora qolmadi.

«Yunayted» 50 yil ichida ilk bor mavsum startidagi uch oʻyinning har birida kamida ikkita gol oʻtkazib yubormoqda.

Ispaniya: Rodrining yubileyi

«Valensiya» – «Barselona» 0:5
Gollar: Yamal, 6 (0:1). Fermin Lopes, 22 (0:2). Rafinya, 50 (0:3). Pedri, 79 (0:4). Yamal, 84 (0:5)
«Valensiya»: Dimitriyevski, Diakabi (Kordoba, 62), Pepelu (Tarrega, 54), Martines, Vaskes (Xose Gayya, 54), Maffeo (Elliott, 54), Deng, Ugrinich, Gerra (Sato, 62), Otorbi (Duro, 76), Gruneveld
«Barselona»: X. Garsiya, Kubarsi (Kristensen, 62), Martin, Espart, E. Garsiya (Kunde, 29), Rodri (Bernal, 62), Pedri (Gabriel Jezus, 81), Fermin Lopes (Olmo, 75), Gordon (Adeyemi, 62), Yamal, Rafinya
Ogohlantirishlar: Martines, 81 – Kubarsi, 45. Rodri, 47. Fermin Lopes, 65

«Barselona» soʻnggi yillarda «Valensiya» uchun chinakamiga dahshatli tushga aylangan va oʻyin boshlanishi bilan mehmonlar buni «Mestalya»dagilarning yodiga solib qoʻyishdi. 6-daqiqada Fermin Lopes qanotdan toʻpni jarima maydoniga yetkazdi, Yamal esa ikki himoyachi bosimi ostida turganiga qaramay, shvedka uslubidagi zarbasi bilan toʻpni darvozabon ustidan oshirib tashladi. Uch daqiqa oʻtib Lamin yana bir bor darvozani ishgʻol etdi, ammo mikroskopik darajadagi ofsayd mezbonlarni qutqarib qoldi. Ammo bu muqarrar ishning shunchaki kechiktirilishi edi, boʻlim oʻrtalariga kelib Fermin Gordonning uzatmasidan keyin toʻpni burchakka aniq yoʻnaltirdi.

«Valensiya» faqat omad tufayli birinchi boʻlimda boshqa gol oʻtkazmadi, ammo oldinda yana 45 daqiqa bor edi va ikkinchi boʻlim davomida ham oʻyin faqat bir darvoza tomon kechdi. Uchinchi gol juda yengillik bilan urildi – Fermin Yamalning boʻsh hududga yoʻllagan uzatmasiga yetib bordi va Rafinyani boʻsh darvoza qarshisiga chiqardi. Braziliyalik vinger toʻrt turdan keyin olti gol urgan holda Messining 13 yil oldingi grafigi boʻyicha ketmoqda. Oʻyin oxirida Pedri va Yamal hisobni yanada yiriklashtirdi. «Barsa» soʻnggi 11 yil ichida ilk bor qatorasiga ikki safar oʻyinida beshtadan gol urishga erishdi.

Ferminning sermahsulligini ham alohida qayd etish mumkin, u dastlabki toʻrt turda olti golli harakat amalga oshirdi: «Barsa»ning ispaniyalik futbolchilariga bunday natija 2011/12 yillar mavsumidan buyon nasib etmagandi (oʻshanda Fabregas shunday koʻrsatkich qayd etgan).

Bu voqealarning barchasi Rodrining La ligadagi yubiley 100-oʻyinida roʻy berdi.

«Barsa» toʻrt turdan keyin 100 foizlik natija bilan turnir jadvalida yaqqol peshqadamga aylangan. Bu turda «Betis»ga yutqazib qoʻygan «Real» esa 9 ochko bilan uchinchi oʻrinda, ikkinchi oʻrinni hali yutqazmagan «Alaves» band etgan.