AQSh-Kanada chegarasida avtomobil portlab ketdi

Niagara sharsharasi yaqinida AQSh va Kanada o‘rtasidagi Kamalak ko‘prigida (Rainbow Bridge) avtomobil portlab ketdi, deb xabar berdi 22 noyabr, chorshanba kuni Federal tergov byurosi (FTB). Hodisa oqibatida mashinada bo‘lgan ikki kishi halok bo‘ldi, deb ta’kidladi Amerikaning CNN va Fox News telekanallari politsiya xodimlariga tayanib. Bundan tashqari, Reuters agentligining xabar berishicha, AQSh chegara xizmatining bir xodimi yaralangan. 

Huquq-tartibot idoralari hodisa tafsilotlarini ma’lum qilmagan. Hozirda tergov harakatlari boshlangan. FTB vaziyat «tez rivojlanayotganini» bildirdi. 

Ba’zi OAV xabarlariga ko‘ra, AQShdan Kanadaga ketayotgan avtomobil qarama-qarshi bo‘lakda katta tezlikda chegara o‘tish joyiga yaqinlashgan.

Nyu-York shtati gubernatori: terakt belgilari yo‘q 

Ikki davlat o‘rtasidagi to‘rtta chegara o‘tish punkti vaqtincha yopildi. Buffalo Niagara xalqaro aeroportida xavfsizlik choralari kuchaytirildi, deya ma’lum qildi Nyu-York shtati gubernatori Keti Xokul. Uning so‘zlariga ko‘ra, terakt belgilari yo‘q. Kamalak ko‘prigi yopiqligicha qolmoqda, ammo qolgan o‘tish joylari bo‘ylab harakat tiklandi, dedi Xokul. 

AQSh prezidenti Jozef Bayden voqea haqida xabardor qilingan, deya xabar berdi Oq uy. Kanada bosh vaziri Jastin Tryudo vaziyatni «juda jiddiy» deb atadi.