Global iqlim o‘zgarishi yiliga 250 ming kishining o‘limiga sabab bo‘ladi – JSST

Anomal issiq, suv toshqinlari, o‘rmon yong‘inlari, muzliklar erishi, dengiz sathining ko‘tarilishi natijasida sodir bo‘layotgan o‘limlar haqida Jahon sog‘liqni saqlash tashkiloti tahlillarini e’lon qildi. Unga ko‘ra, oxirgi 20 yil ichida 65 yoshdan kattalar o‘rtasida jazirama haroratdan vafot etish ko‘rsatkichi 70 foizga oshgan.

Toza ichimlik suvi tanqisligi 5 yoshgacha bo‘lgan bolalar o‘rtasida oldini olish mumkin bo‘lgan kasalliklarning o‘lim bilan yakun topishiga sabab bo‘lyapti.

Havo ifloslanishi sabab kelib chiqadigan xastaliklar har yili 7 million kishini hayotdan erta olib ketmoqda.

JSST bosh direktori Tedros Gebreyesusning ma’lum qilishicha, agar vaziyat o‘nglanmasa, kelgusi o‘n yillikda iqlim o‘zgarishi bilan bog‘liq omillar har yili 250 ming kishining umriga zomin bo‘lishi mumkin. Chunki hozir 3 milliarddan ortiq inson xuddi shunday ekologik murakkab mintaqalarda yashaydi.