Orolbo‘yidagi aholi punktlariga Saudiyaning gumanitar va moliyaviy-texnik yordami jalb etiladi 

Mamlakat elchixonasi ko‘magida O‘zbekiston Sog‘liqni saqlash vazirligi rahbariyati va Butunjahon islom olami uyushmasi mas’ul xodimlari o‘rtasida video-konferensiya shaklida uchrashuv tashkil etildi.

«Dunyo» xabariga ko‘ra, onlayn uchrashuvda O‘zbekiston sog‘liqni saqlash vazirining o‘rinbosari Farhod Toshpo‘latov, mamlakat elchixonasi xodimlari, Saudiya tomonidan Butunjahon islom olami uyushmasi bosh kotibining yordam va rivojlanish masalalari bo‘yicha maslahatchisi Iyman Falemban ishtirok etdi.

Muloqot chog‘ida ta’lim va sog‘liqni saqlash sohasida hamda Orolbo‘yi mintaqasi aholi punktlariga Saudiya Arabistonining gumanitar va moliyaviy-texnik yordamini jalb etish, Toshkent va Namangan shaharlarida beg‘araz yurak jarrohlik operatsiyalarini amalga oshirish masalalari muhokama qilindi.

- Butunjahon islom uyushmasi O‘zbekiston bilan hamkorlik aloqalarini har tomonlama mustahkamlash va jadal rivojlantirishdan manfaatdor, - dedi u. - Jumladan, O‘zbekistonda beg‘araz yurak, suyak va ko‘z jarrohlik operatsiyalarini amalga oshirishga tayyormiz.

Sog‘liqni saqlash vazirining o‘rinbosari Farhod Toshpo‘latov birinchi bosqichda Toshkent va Namangan shaharlarida 100 dan ziyod muhtoj bemorlarga yurak jarrohlik operatsiyalarini o‘tkazish rejalashtirilganini ma’lum qildi.

Muloqot davomida, shuningdek, saudiyalik shifokorlarning O‘zbekistonga ishchi tashrifini tashkil etish, yurak jarrohligi amaliyotlarini bajarish muddatlari, bemorlarning yosh toifasini belgilash va boshqa masalalar yuzasidan fikr almashildi.