Tadbirkor Dilshod To‘raxo‘jayevga oid sud ishi 1 oy muddatga to‘xtatildi

Holat yuzasidan Ichki ishlar vazirligining rasmiy bayonotiga ko‘ra, “yirik uyushgan jinoiy guruh tadbirkorlarga nisbatan tovlamachilik qilib ularni qo‘rquv ostida ushlab kelgani, ular ilgari og‘ir turdagi jinoyatlar bilan bir necha marotaba sudlangani hamda nihoyatda tajovuzkor ekani sababli maxsus kuchlarni jalb etgan holda” qo‘lga olingan.

“Gumondorlarning yonidan oldindan maxsus tayyorlangan 2 dona o‘tkir tig‘li jism, bir nechta skotch, ichki ishlar organlari xodimlarining dala formalari, rezina qo‘lqoplar, 0,7 gramm “opiy” giyohvandlik moddasi, tramadol tabletkasi va sport sumkasi daliliy ashyo sifatida olingan”, deyiladi rasmiy bayonotda.

Tadbirkor tergov paytida qiynoqqa solinganmidi?

O‘zbekiston inson huquqlari “Ezgulik” jamiyatiga murojaat qilgan Doniyor To‘raxo‘jayev bosqinchilikda gumonlangan 40 yashar ukasi Dilshodjonning 12-15 aprel kunlari Toshkent shahar IIBB tergov bo‘limida shafqatsiz qiynoqlarga solingani, og‘zi va qo‘llari skotch bilan bog‘lanib, noinsoniy qiynoqlarga solinganini iddao qiladi. 

“Surishtiruv, advokatlari va guvohlar bilan suhbatlardan so‘ng ma’lum bo‘ldiki, Dildoshjon To‘raxo‘jayev haqiqatan ham fuqaro kiyimidagi jinoyat qidiruv bo‘limi xodimlari, qora maxsus kiyimdagi “ajal farishtalari” va tergovchilar tomonidan majburiy ko‘rsatma olish maqsadida qiynoqqa solingan”, deyiladi “Ezgulik” jamiyati matbuot xizmati nomidan tarqatilgan xabarda.

Dilshod To‘raxo‘jayevning advokati Nurullo To‘laganov ham mijozi tergov bo‘limlarida shafqatsiz kaltaklanganini aytib, uning tan jarohatlari aks etgan suratlarni e’lon qiladi.

Advokat mijozining olib ketilish tafsilotlariga to‘xtalarkan, uning protsessual huquqlari buzilganini aytgan.

“IIB binosiga kirgandan keyin uyiga bir marta telefon qilish huquqi bor. Lekin bu talab ham bajarilmagan. Uydagilari 15 aprelda uni qidirib, Toshkentga olib ketilganini aniqlashgan, shundan so‘ng meni shartnoma asosida yollashdi. Tergovchini topib gaplashsam, u ham ko‘rishishga ruxsat bermadi, sudda gaplashib olarsiz, dedi”, – deya ta’kidlagan advokat.

Sudda ko‘rishganda To‘laganov tadbirkor badanida jarohatlar paydo bo‘lganini ko‘rib, ularni tasvirga tushirib olgan.

IIV esa Dilshod To‘raxo‘jayev qo‘lga olinayotganda qattiq qarshilik ko‘rsatgani, shu sababli maxsus xizmatlar tomonidan unga jismoniy kuch ishlatilgani, erkakning tanasidagi momataloq izlari shuning asoratlari ekani haqida rasmiy munosabat bergan.

Tadbirkorning jarohat olgan suratlari tarqalgach, 6 may kuni Oliy Majlisning inson huquqlari bo‘yicha vakili Toshkent viloyati, Zangiota tumanidagi 1-son Tergov hibsxonasiga borib, Dilshod To‘raxo‘jayev bilan uchrashgan. Suhbat davomida tadbirkor o‘ziga nisbatan Pop tumani IIBda va keyinchalik Toshkent shahar IIBBda ruhiy va jismoniy bosim o‘tkazilganini tasdiqlagan.

6 may kuni Oliy Majlisning inson huquqlari bo‘yicha vakili va uning huzuridagi Jamoatchilik guruhlari a’zolari Zangiota tumanidagi 1-son Tergov hibsxonasiga borib, Dilshod To‘raxo‘jayev bilan uchrashgan. Suhbat davomida tadbirkor o‘ziga nisbatan Pop tumani IIBda va keyinchalik Toshkent shahar IIBBda ruhiy va jismoniy bosim o‘tkazilganini, qiynoqlar natijasida aybiga iqror bo‘lganini ma’lum qilgan. 

O‘zbekiston bosh prokurorining matbuot kotibi Hayot Shamsuddinov To‘raxo‘jayevga nisbatan jismoniy tazyiq o‘tkazilgani holati yuzasidan tadbirkorning himoyachisi bergan arizaga asosan Mirobod tuman prokuraturasi tomonidan tergovga qadar tekshiruv harakatlari olib borilayotganini, tekshiruv davomida tadbirkorning tan jarohati olgani hamda uning barcha vajlari har tomonlama, to‘la va xolisona tekshirilib, to‘plangan dalillarga asosan huquqiy baho berilishi ta’minlanishini bildirgan edi. Biroq o‘rganish ishlari natijasi hozirgacha jamoatchilikka noma’lum.