«Kiyevdagi paraddan keyin bizga buni kim taqiqlaydi?» - Rossiyalik siyosatchi SSSR hududlarini RFga birlashtirishni taklif etdi

Rossiyalik yozuvchi, siyosiy va harbiy arbob Zaxar Prilepin ilgari SSSRga tegishli bo‘lgan barcha hududlarni tiklash tashabbusi bilan chiqdi. U bu haqda Moskvadagi matbuot anjumanida jurnalistlarning savollariga javob berish asnosida gapirgan.

Prilepin migrantlar muammosini hal qilish uchun rus ayollari ko‘proq bola tug‘ishi kerakligini ta’kidlagan.

«Ruslar qancha ko‘p bo‘lsa, ko‘p sonli migrantlar bizning yurtda o‘zini noto‘g‘ri tutishi bilan bog‘liq muammolar kamroq bo‘ladi», — dedi u. Yozuvchi, shuningdek, «migrantlarni Rossiyada emas, balki ular kelgan davlatlarda, deylik, O‘zbekistonda, o‘qitish»ni taklif qildi.

Yozuvchi misol sifatida O‘zbekistonning ikki million fuqarosi shu yerda yashayotgani uchun Rossiya bu hududga da’vo qila olishini qayd etgan.

«Men hazillashayotganim yo‘q. Biz Sovet Ittifoqini qayta tiklash mavzusini ko‘taramiz va bu bizga istalgan vaqtda „sizning ikki million fuqarongiz bizning hududda ekan, biz sizning hududingizga da’vo qilamiz, chunki ko‘pchilik allaqachon shu yerda, hattoki bunga ovoz berishgan“, deyishga imkon beradi. Kiyevdagi paraddan keyin Yevroosiyo hududida biror narsa qilishni bizga kim taqiqlaydi? Hech kim», – deya Prilepinning so‘zlarini keltirgan «Ostorojno, novosti» Telegram-kanali.

Shu bilan birga, u bu o‘zining shaxsiy fikri ekanini qo‘shimcha qilgan. Matbuot anjumanida qatnashayotganlar uning gapini qarsaklar bilan qo‘llab-quvvatlagan.

• Zaxar Prilepin 2014 yildan Ukraina hududidagi harbiy harakatlarda ishtirok etishni boshlagan va harbiy muxbir sifatida «DXR» va «LXR» hududlarida ishlagan. 2016 yil oktyabridan 2018 yil iyuliga qadar ayirmachilar armiyasida batalyon komandiri o‘rinbosari bo‘lgan. 2022 yil fevralida Ukrainaga bosqin boshlangach, «Oplot» ko‘nggillilar batalyoni safiga kirib, urushga otlangan. Ayni vaqtda u polkka aylantirilgan ushbu tuzilma komandirining harbiy-siyosiy masalalar bo‘yicha o‘rinbosari sanaladi.
• Unga 2023 yil may oyida Nijniy Novgorod shahrida suiqasd uyushtirilgandi. O‘shanda uning boshqaruvidagi Audi avtomobilining kapoti ostiga joylashtirilgan portlovchi qurilma ishga tushgandi. Portlash oqibatida yozuvchining tansoqchisi halok bo‘lgan, o‘zi esa rulda bo‘lgani tufayli omon qolgandi va tan jarohatlar bilan shifoxonaga yotqizilgandi.
• Rossiya TIV rasmiysi Mariya Zaxarova suiqasdda Ukraina, AQSh, Buyuk Britaniya va NATOni ayblagan. BBC ma’lumotiga ko‘ra, suiqasd uchun javobgarlikni «Atesh» partizanlik harakati o‘z zimmasiga olgan.

{Yii::t(}

O'tkazib yuborish 6s

O'tkazib yuborish