Bu vaziyatda «milliy manfaatlarga javob beradigan to‘g‘ri yo‘lni topish oson bo‘lmayotgani» ta’kidlangan.
22 dekabr kuni Shavkat Mirziyoyev raisligida Respublika Ma’naviyat va ma’rifat kengashi yig‘ilishida jahon miqyosida taraqqiyot sur’atlari misli ko‘rilmagan darajada shiddatli tus olayotgani ta’kidlandi.
Prezident ayni vaqtda azaliy qadriyatlar, ijtimoiy-siyosiy qarashlar tizimida chuqur transformatsiya jarayonlari yuz berayotganini aytib o‘tdi.
«Ilgari o‘z maqsad va manfaatlarini asosan diplomatiya va siyosat bilan himoya qilib kelgan dunyodagi qudratli markazlar endi ochiqchasiga bosim o‘tkazish, qarama-qarshilik va to‘qnashuvlar yo‘liga o‘tganiga hammamiz guvohmiz. Afsuski, bunday keng ko‘lamli va o‘ta ziddiyatli jarayonlarning ta’siri Markaziy Osiyo mintaqasi va uning tarkibiy qismi bo‘lgan mamlakatimizni ham chetlab o‘tmayapti», — dedi davlat rahbari.
«Ana shunday g‘oyat murakkab va tahlikali vaziyatda O‘zbekistonning milliy manfaatlariga javob beradigan to‘g‘ri yo‘lni topish, albatta, oson bo‘lmayapti», — deya ta’kidladi prezident.
Davlat rahbari O‘zbekiston dunyodagi uzoq-yaqin barcha davlatlar bilan o‘zaro manfaatli aloqalarni rivojlantirishga harakat qilayotganini qo‘shimcha qilgan.
