O‘zbekistonda madaniy meros obektlariga 28 mlrd so‘mdan ziyod zarar yetkazilgan

2023 yil davomida madaniy meros obektlarini asrashga doir ishlar bo‘yicha 53 ta madaniy meros obektida restavratsiya, ta’mirlash-tiklash ishlarini bajarish va qolgan obektlarning loyiha hujjatlarini ishlab chiqish uchun 49,1 milliard so‘mlik shartnomalar rasmiylashtirilgan va ta’mirlash-tiklash ishlari olib borilmoqda.

Shuningdek, 5 ta davlat muzeyi binolarini mukammal ta’mirlash uchun 2,7 milliard so‘mlik pudrat shartnomalari rasmiylashtirilgan, 6 ta davlat muzeyi binosini mukammal ta’mirlash uchun loyihalashtirish tashkilotlari bilan 414 million so‘mlik loyiha shartnomalari ustida ish olib borilmoqda.

Qayd etilishicha, 2023 yil davomida madaniy meros obektlari hamda uning tutash hududlarida 160 (25 ta jinoiy, 135 ta ma’muriy) noqonuniy holatlar aniqlangan hamda huquqni muhofaza qiluvchi organlarga murojaat qilingan. 

Amalga oshirilgan davlat nazorati tadbirlarida madaniy meros obektlariga umumiy hisobda 28 milliard so‘mdan ziyod zarar yetkazilgani aniqlangan. 

Mamlakat hududidan madaniy boyliklarni noqonuniy yo‘llar bilan olib chiqishga urinish holatlari davomida jami 1,6 milliard so‘mlik 2036 ta ashyo tegishli tartibda to‘xtatib qolingan va 210 ta ekspertiza xulosasi tayyorlangan.