26 dekabr kuni o‘tkazilgan matbuot anjumani qisqa bo‘lib, oldindan anons qilinmagandi.
Zalujniy shu kunlarda parlamentga kiritilgan safarbarlik, demobilizatsiya va harbiy xizmat to‘g‘risidagi hukumat qonun loyihalarining shov-shuvli paketi bo‘yicha izoh berdi, shuningdek, frontdagi vaziyat hamda kelgusi yil Ukraina mudofaasi uchun qanday kechishi to‘g‘risidagi fikrlarini bildirdi.
Ukraina qancha odamni safarbar qilishi kerak?
OAVda ko‘p ham ko‘rinish beravermaydigan Zalujniy matbuot anjumani oldidan bir muddat milliy telemarafonga qo‘shildi hamda Ukraina prezidenti Volodimir Zelenskiyning harbiy qo‘mondonlik kelgusi yilda 450-500 ming kishini safarbar etish bo‘yicha taklif bergani haqida aytgan so‘zlariga munosabatini bildirdi.
Zalujniyning aniqlik kiritishicha, Bosh shtab «hech qanday raqamlar bo‘yicha hech qanday so‘rov yubormagan», armiya o‘z ehtiyojlarini hozirgi shtatlar, yangi harbiy qismlar tuzilishi va kelgusi yilda bo‘lishi mumkin bo‘lgan yo‘qotishlarni hisobga olgan holda shakllantiradi.
«Bu raqamni ochiqlay olmaymiz, chunki bu harbiy sir», – degan u. – Biz resurslar – harbiy texnika va odamlar uchun so‘rovlar shakllantiramiz. Bu takliflarning barchasini biz qonunchilik tashabbusi sub’yekti sifatida mudofaa vazirligiga kiritamiz, uyog‘iga buni qanday ta’minlashni vazirlik hal qiladi. Bizga snaryadlar, qurol va odamlar zarur. Qolgan barcha ishni vakolatli organlar amalga oshiradi».
Bo‘yin tovlovchilar, muddatli harbiy xizmatga chaqiriluvchilar va rotatsiya haqida
Matbuot anjumani boshlangach esa Zalujniy safarbarlikning yangi qoidalari bo‘yicha qonun loyihalarini batafsil izohladi.
Ulardan asosiysi parlamentga 25 dekabr kuni kechqurun kiritilgan. U safarbar qilish yoshini 27 dan 25 ga tushirish, harbiy ro‘yxatga olish va chaqiruv qog‘ozini topshirish tartibini soddalashtirish, shuningdek xizmatdan bo‘yin tovlaganlik uchun sanksiyalarni qat’iylashtirish (ko‘p minglik jarimaga tortish va qamoqqa olishgacha)ni nazarda tutadi.
Bundan tashqari, qonun loyihasida harbiy holat davrida uch yildan ortiq xizmat qilganlar hamda asirlikda bo‘lganlarni demobilizatsiya qilish imkoniyati ham ko‘zda tutilgan.
Zalujniy harbiylar hujjatlarni tayyorlash bo‘yicha ishchi guruh tarkibida ishlagan bo‘lsa-da, aksar qoidalar, ayniqsa fuqarolarni safarbar qilish va xizmatdan bo‘yin tovlaganlik uchun sanksiyalar bilan bevosita bog‘liq bo‘lgan moddalar Bosh shtab tomonidan ishlab chiqilmagan.
