Qoidabuzarga MJtKning ikkita moddasida nazarda tutilgan huquqbuzarliklar uchun chora ko‘rilgan.
Ijtimoiy tarmoqlarda Qo‘qon shahrida bloger yo‘lning qatnov qismida stol-stul qo‘yib ovqatlanayotgani aks etgan video tarqaldi.
Farg‘ona viloyati IIB axborot xizmatining xabar berishicha, qoidabuzaliklar sodir etgan blogerga qonuniy chora ko‘rilgan.
Ma’lum qilinishicha, hodisa 2024 yil 2 yanvar kuni sodir bo‘lgan. Bloger yo‘lning qatnov qismiga stol-stul qo‘yib ovqatlangan.
U yo‘ldan o‘tib ketayotgan haydovchilarga birga choy ichishni ham taklif etgan va jarayonni videoga olib, ijtimoiy tarmoqlarga joylagan.
Qayd etilishicha, blogerga nisbatan MJtKning 183-moddasi (mayda bezorilik) va 138-moddasida (piyodalar va yo‘l harakati boshqa ishtirokchilarining yo‘l harakati qoidalarini buzishi) ko‘rsatilgan huquqbuzarliklar yuzasidan hujjatlar rasmiylashtirilgan.
