Samarqandda fuqarolarni AQShga, Namanganda Koreyaga yubormoqchi bo‘lgan shaxslar ushlandi

Samarqand viloyatida fuqarolarni katta pul evaziga Meksika orqali AQShga, Namanganda esa Janubiy Koreyaga yubormoqchi bo‘lgan shaxslar ushlandi. Bu haqda Bosh prokuratura huzuridagi departament xabar bermoqda.

Departamentning Samarqand viloyat boshqarmasi, DXX va IIB xodimlari bilan hamkorlikda o‘tkazilgan tezkor tadbirda fuqaro S.S. fuqaro M.A.ni 18 000 dollar evaziga Turkiya, Qatar va Meksika orqali AQShga o‘tkazib qo‘yishni va’da qilib, shundan 9 000 dollar olgan vaqtida ashyoviy dalillar bilan ushlangan.

Departamentning Namangan viloyat boshqarmasi tomonidan o‘tkazilgan tergovga qadar tekshiruvda fuqaro M.U. fuqaro A.A.ning ishonchiga kirib, uning o‘g‘li D.N.ni Koreyaga ishga yuborish uchun tanishlari yordamida viza olib berishi evaziga 2 600 dollar olgani aniqlanib, ushbu pullar hisobidan 300 dollar qaytarilishi protsessual tartibda rasmiylashtirilgan.