Eronga kirishda O‘zbekiston fuqarolari uchun vizasiz rejim 4 fevraldan amal qiladi

O‘zbekiston fuqarolari 4 fevraldan e’tiboran Eronga 15 kungacha vizasiz sayohat qilishlari mumkin, deb xabar bermoqda «Dunyo» AA.

Eron Tashqi ishlar vazirligi vakili Ali-Reza Bigdelining ma’lumotlariga ko‘ra, 28 ta davlat fuqarolari uchun viza olish talabi bekor qilingan. Ushbu mamlakatlar: Saudiya Arabistoni, Qatar, BAA, Bahrayn, Kuvayt, O‘zbekiston, Qirg‘iziston, Tunis, Tanzaniya, Mavritaniya, Zimbabve, Mavrikiy, Seyshel orollari, Yaponiya, Indoneziya, Singapur, Kuba, Vetnam, Kambodja, Bruney, Braziliya, Meksika, Peru, Xorvatiya, Serbiya, Bosniya va Gersegovina, Belarus va Hindiston.

O‘z navbatida, Hindiston fuqarolari Eronga havo transportidan foydalangan holda kirgandagina vizasiz rejim amal qiladi, quruqlikdagi chegaralar orqali kirmoqchi bo‘lsa, viza olishlari kerak.

Avvalroq, Eron Vazirlar Mahkamasi bir tomonlama tartibda 32 davlat bilan viza rejimini bekor qilishni ma’qullagani xabar qilingandi.

Ma’lumot uchun, BAA ham 16 fevraldan boshlab O‘zbekiston fuqarolari uchun 30 kunlik vizasiz rejim joriy qilgan.