Pentagon bosh inspektorining AQSH Kongressiga taqdim etgan hisobotida Erondagi urush Amerika qurolli kuchlarining strategik oʻq-dori zaxiralariga sezilarli taʼsir koʻrsatgani qayd etildi.
Hujjat 28-fevraldan 30-iyungacha boʻlgan davrni qamrab oladi. Unga koʻra, Epic Fury operatsiyasining shu davrdagi umumiy qiymati 33,4 mlrd dollarni tashkil etgan. Bu mablagʻning 22,3 mlrd dollari ishlatilgan oʻq-dori va qurol-yarogʻga sarflangan.
Hisobotda katta hajmdagi oʻq-dori sarfi strategik zaxiralarda taqchillik yuzaga keltirgani va ularni toʻldirish boʻyicha AQSH mudofaa sanoati imkoniyatlaridagi cheklovlarni koʻrsatib bergani aytilgan.
Pentagon tanqislikni yumshatish uchun xarid va ishlab chiqarish jarayonlarini tezlashtirish, muhim materiallar, butlovchi qismlar va ayrim turdagi oʻq-dorilar zaxirasini koʻpaytirish ustida ishlayotganini bildirgan. Biroq ishlab chiqarish quvvatlarini kengaytirish uchun ancha vaqt talab etilishi qayd etilgan.
Hisobotda AQShning harbiy yoʻqotishlari haqida ham maʼlumot berilgan. Jumladan, toʻrtta F-15 qiruvchi samolyoti yoʻqotilgan, bitta F-35 shikastlangan. Shuningdek, yettita KC-135 yonilgʻi quyuvchi samolyotiga zarar yetgan va 30 tagacha MQ-9 Reaper uchuvchisiz apparati yoʻqotilgan.
Hujjatda 28-fevral–30-iyun oraligʻida yetti nafar amerikalik harbiy xizmatchi jang harakatlarida halok boʻlgani va 417 nafari yaralangani ham koʻrsatilgan.
Eron zarbalari natijasida Yaqin Sharqdagi AQSH harbiy bazalarida yuzlab bino va inshootlar shikastlangan yoki vayron boʻlgan. AQShning Iroq, Kuvayt, Saudiya Arabistoni va BAAdagi diplomatik obyektlariga yetkazilgan moddiy zarar qariyb 184 mln dollarga baholangan.
Ayni paytda AQSH maʼmuriyati qurol-yarogʻ zaxiralari bilan bogʻliq xavotirlarga boshqacha baho berib kelmoqda. Prezident Donald Tramp avvalroq AQShda yetarli miqdorda qurol-yarogʻ mavjudligini taʼkidlagan.
Oʻq-dori zaxiralarining qisqarishi AQShdan harbiy mahsulotlar oladigan hamkorlar uchun ham ahamiyatli boʻlishi mumkin. Xususan, Ukraina Patriot tizimlari uchun raketalarga ehtiyoj bildirib kelmoqda, Tayvan esa AQShdan qurol xarid qilish boʻyicha shartnomalarga ega.
